හිටපු පාර්ලිමේන්තු මන්ත්රී අමරකීර්ති අතුකෝරාල මහතා සහ ඔහුගේ ආරක්ෂක නිලධාරියා ඝාතනය කිරීමේ සිද්ධියට වරදකරුවන් වූ පුද්ගලයන් 12 දෙනෙකුට මරණ දඬුවම නියම කිරීමට එරෙහිව ඇපෑලක් ඉදිරිපත් කරන බව ජන අරගල සන්ධානය ප්රකාශ කර තිබෙනවා. අද (13) කොළඹදී පැවති මාධ්ය හමුවකට එක්වෙමින් එම සන්ධානයේ විධායක කමිටු සාමාජික නුවන් බෝපගේ මහතා අවධාරණය කළේ, සිද්ධියට අදාළ සැබෑ “ඝාතකයින්” තවමත් නිදහසේ පසුවන බවත්, මෙම ඛේදවාචකයට එවකට පැවති රාජපක්ෂ-රනිල් හවුල් පාලනයේ දේශපාලන වාතාවරණය වගකිව යුතු බවත්ය.
මැයි 9 වනදා ගාලු මුවදොර අරගල භූමියට (GotaGoGama) එල්ල වූ ප්රහාරය සම්බන්ධයෙන් නීතිපති දෙපාර්තමේන්තුවේ ක්රියාකලාපය ද මෙහිදී දැඩි විවේචනයට ලක් විය. සනත් නිශාන්ත, ජොන්ස්ටන් ප්රනාන්දු සහ නාමල් රාජපක්ෂ වැනි දේශපාලනඥයන් එම ප්රහාරවලට වගකිව යුතු වුවද ඔවුන්ට එරෙහිව මෙතෙක් නිසි නීතිමය පියවර ගෙන නොමැති බව පෙන්වා දුන් ඔහු, සාමාන්ය ජනතාවට පමණක් නීතිය දැඩි ලෙස ක්රියාත්මක වීම ප්රශ්න කළේය. සිදුවූයේ කුමක්ද යන්න පිළිබඳව සැබෑ කරුණු හෙළිදරව් කරමින් වැරදිකරුවන් වූවන් වෙනුවෙන් උපරිම නීතිමය සහාය ලබා දීමට කටයුතු කරන බවයි ඔහු වැඩිදුරටත් කියා සිටියේ.
