සෞදි අරාබිය සිය රටේ සිටින ඔටුවන් මිලියන 2.2 ක් පමණ වන සංඛ්යාවකට විදේශ ගමන් බලපත්ර නිකුත් කිරීමට තීරණය කර ඇත්තේ ප්රධාන වශයෙන්ම එම සතුන් වඩාත් විධිමත්ව පාලනය කිරීම සහ එමගින් උපරිම ආර්ථික ප්රතිලාභ ලබා ගැනීමේ අරමුණ ඇතිවය. මෙම ක්රමවේදය හරහා සෑම ඔටුවෙකුම නිවැරදිව හඳුනා ගැනීමටත්, ඔවුන්ගේ හිමිකරුවන් පිළිබඳ විශ්වාසදායක දත්ත ගබඩාවක් නිර්මාණය කිරීමටත් බලධාරීන්ට හැකියාව ලැබෙන අතර එය සතුන්ගේ පෝෂණය හා සෞඛ්ය තත්ත්වය වඩාත් හොඳින් නිරීක්ෂණය කිරීමට ද උපකාරී වේ.
සෞදි ආර්ථිකයට වසරකට රියාල් බිලියන 2 කට අධික ආදායමක් ලබා දෙන ඔටුවන්, එරට සංස්කෘතික අනන්යතාවයේ මෙන්ම ‘Vision 2030’ ආර්ථික සැලැස්මේ ද වැදගත් කොටසක් බවට පත්ව තිබේ. වර්තමානය වන විට ඔටු කිරි ආශ්රිත නිෂ්පාදන රටවල් 25 කට අපනයනය කෙරෙන අතර, ඔටුවන්ගේ සම සහ ලොම් භාවිතයෙන් සකසන ඉහළ වටිනාකමකින් යුත් ඇඳුම්, බෑග් සහ සපත්තු වැනි නිෂ්පාදන ද දේශීය හා ජාත්යන්තර වෙළඳපොළට හඳුන්වා දී ඇත. විශේෂයෙන්ම කිඹුල් සමට පසුව ලොව දෙවන ශක්තිමත්ම සම ලෙස සැලකෙන ඔටු සම ආශ්රිත කර්මාන්තය දියුණු කිරීම කෙරෙහි ද රජයේ අවධානය යොමුව පවතී.
ආර්ථික වටිනාකමට අමතරව, ඔටුවා යනු සෞදි අරාබියේ ජාතික ලාංඡනයේ කොටසක් වන තරමටම එරට ඉතිහාසය, ආගම සහ සංස්කෘතිය සමඟ දැඩිව බැඳී සිටින සත්වයෙකි. අතීතයේදී මක්කම සහ මදීනා වැනි ශුද්ධ නගර වෙත ගමන් කිරීම සඳහා වූ ප්රධානතම ප්රවාහන මාධ්යය වූයේ ද ඔටුවන්ය. මෙම ඓතිහාසික සබඳතාවය සහ අභිමානය සුරකිමින්, නූතන තාක්ෂණය භාවිතා කර ඔටුවන් කළමනාකරණය කිරීම හරහා තෙල් කර්මාන්තයෙන් බැහැරව රටට ශක්තිමත් ආදායම් මාර්ගයක් ගොඩනැගීමට සෞදි රජය අපේක්ෂා කරයි.
