ජිනීවාහි එක්සත් ජාතීන්ගේ කාර්යාලයේ සහ ස්විට්සර්ලන්තයේ අනෙකුත් ජාත්යන්තර සංවිධානවල ශ්රී ලංකා ස්ථාවර නියෝජිතයා ලෙස අලුතින් පත්වූ තානාපති සුමිත් දසනායක මහතා, එක්සත් ජාතීන්ගේ ජිනීවා කාර්යාලයේ අධ්යක්ෂ ජනරාල් ටැටියානා වැලෝවායා (Tatiana Valovaya) මහත්මිය වෙත සිය අක්තපත්ර නිල වශයෙන් පිළිගන්වා තිබේ.
අක්තපත්ර පිළිගැන්වීමෙන් අනතුරුව තානාපති දසනායක මහතා, ජනාධිපති අනුර කුමාර දිසානායක මහතාගේ සහ විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතාගේ සුබපැතුම් අධ්යක්ෂ ජනරාල්වරිය වෙත පිරිනැමීය.
මෙහිදී අදහස් දක්වමින් අධ්යක්ෂ ජනරාල් වැලෝවායා මහත්මිය, ගෝලීය මුලපිරීම් සඳහා ශ්රී ලංකාව දක්වන ක්රියාකාරී දායකත්වය අගය කළාය. විශේෂයෙන්ම ජිනීවා එක්සත් ජාතීන්ගේ කාර්යාලයේදී ජාත්යන්තර වෙසක් දින උත්සවය සංවිධානය කිරීම සහ 2025 වසරේදී සමරනු ලැබූ මංගල ජාත්යන්තර තේ දිනය සඳහා ශ්රී ලංකාව දැක්වූ දායකත්වය ඇය සිහිපත් කළාය. එසේම සිය කාර්යාලය මෙහෙයවන වත්මන් සහ අනාගත ව්යාපෘති සඳහා අඛණ්ඩව සහයෝගය දක්වන ලෙස ඇය ශ්රී ලංකාවට ආරාධනා කළාය.
1998 වසරේදී ශ්රී ලංකා විදේශ සේවයට එක්වූ සුමිත් දසනායක මහතා අත්දැකීම් බහුල ජ්යෙෂ්ඨ රාජ්ය තාන්ත්රිකයෙකි. ඔහු මීට පෙර විදේශ කටයුතු අමාත්යාංශයේ මානව සම්පත් සහ දූත මණ්ඩල කළමනාකරණ අධ්යක්ෂ ජනරාල්වරයා ලෙස මෙන්ම මානව සම්පත් සංවර්ධන, පුහුණු හා පර්යේෂණ අංශයේ ප්රධානියා ලෙස ද කටයුතු කර ඇත. එසේම 2021 සිට 2024 දක්වා බ්රසීලයේ ශ්රී ලංකා තානාපතිවරයා ලෙස ද ඔහු සේවය කළේය.
