පෞද්ගලික සහල් මෝල් හිමියන් සහල් තොග අඩු මිලට විකිණීමට සිදුවන බව පවසමින් සහල් නිෂ්පාදනය සීමා කර ඇති අතර, මෙහි බලපෑම මත ගොවීන්ගෙන් වී මිලට ගැනීමේදී විවිධ බාධාවන් පමුණුවමින් සිටිති. මේ හේතුවෙන් වවුනියාව ප්රදේශයේ නාඩු වී කිලෝවක මිල රුපියල් 75 ත් 80 ත් දක්වා පහත වැටී ඇති අතර, එලෙස ලබා ගන්නා වී තොග සඳහා මුදල් ගෙවීමට ද මෝල් හිමියන් මාසයකට වැඩි කාලයක් කල් ඉල්ලා සිටින බව ගොවීහු මැසිවිලි නගති.
මෙම අසාධාරණ තත්ත්වයට විකල්පයක් ලෙස වවුනියාවේ ගොවීන් රජයේ වී ගබඩාවලට සිය අස්වනු ලබා දීමට පෙළඹී සිටිති. රජයේ වී මිලදී ගැනීමේ ක්රියාවලියේදී සැලකිල්ලට ගන්නා ප්රධාන කරුණ වන්නේ වීවල තෙතමනය 14% කට වඩා අඩු මට්ටමක පැවතීමයි. එම ප්රමිතිය සපුරාලීම සඳහා ගොවීන් මහා මාර්ග දෙපස සිය වී තොග වේළා ගනිමින් සිටින අතර, මීට පෙර පාළු ස්වභාවයක් ගත් රජයේ වී ගබඩා අසල මේ වන විට වී රැගෙන ආ වාහන දිගු පෝලිම් දක්නට ලැබෙන බව වාර්තා වේ.
මෝල් හිමියන්ගේ ඒකාධිකාරයට එරෙහිව රජය මැදිහත් වී ගොවියාට සාධාරණ මිලක් ලබා දීමේ අවශ්යතාවය ද මෙහිදී ප්රදේශවාසීන් පෙන්වා දෙයි. විශේෂයෙන්ම කන්නයේ අස්වනු නෙළන මෙම වකවානුවේදී ගොවීන්ට සිය ණය බර පියවා ගැනීමට කඩිනමින් මුදල් අවශ්ය වීම මෙම තත්ත්වයට ප්රධාන හේතුව වී තිබේ.
