රාජ්ය සේවයේ නියුතු නිලධාරීන්ගෙන් අති බහුතරයක් දූෂණයෙන් තොර, සොරකම් සිදු නොකරන අවංක පිරිසක් බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසයි. දූෂණ චෝදනාවලට ලක්ව ඇත්තේ ඉතා සුළු පිරිසක් බවත්, එම පිරිස විසින් සමස්ත රාජ්ය සේවයම දූෂිත බවට පෙන්වීමට උත්සාහ කරන බවත් අමාත්යවරයා පෙන්වා දුන්නේය.
නාරාහේන්පිට ජාතික රුධිර පාරවිලයන මධ්යස්ථානයේදී පැවැති “සුපිළිපන් රාජ්ය සේවයක් නිර්මාණය කිරීම” පිළිබඳ දැනුවත් කිරීමේ වැඩසටහනකට එක්වෙමින් අමාත්යවරයා මේ බව සඳහන් කළේය. සෞඛ්ය හා ජනමාධ්ය අමාත්යාංශයේ අභ්යන්තර කටයුතු ඒකකය විසින් සංවිධානය කරන ලද මෙම වැඩසටහනේදී දූෂණ අවදානම් හඳුනා ගැනීම, අක්රමිකතා පැමිණිලි කළමනාකරණය සහ දූෂණය වැළැක්වීමේ ක්රියාමාර්ග පිළිබඳව නිලධාරීන් දැනුවත් කෙරිණි.
වර්තමාන රජය කිසිවිටෙකත් රාජ්ය සේවකයින් දූෂණයට නොපොළඹවන බවත්, දූෂණයට එරෙහිව දැඩිව පෙනී සිටින බවත් මෙහිදී අවධාරණය කෙරිණි. ආයතනික සාර්ථකත්වය සඳහා සාමූහිකව නිවැරදි තීන්දු ගැනීම සහ විනිවිදභාවයෙන් යුත් පසු විපරම් ක්රියාවලියක වැදගත්කම ද අමාත්යවරයා මෙහිදී පෙන්වා දුන්නේය.
මෙම අවස්ථාවට ජනාධිපති ලේකම් කාර්යාලයේ නිලධාරීන්, අල්ලස් හෝ දූෂණ චෝදනා විමර්ශන කොමිෂන් සභාවේ නියෝජිතයින් සහ අමාත්යාංශයේ උසස් නිලධාරීන් රැසක් සහභාගී වී සිටියහ.
