ඇමරිකා එක්සත් ජනපද පැසිෆික් නාවික බල ඇණියේ අණදෙන නිලධාරී අද්මිරාල් ස්ටීවන් ටී. කෝලර් (Stephen T. Koehler) මහතා ඊයේ (19) ආරක්ෂක අමාත්යාංශයේදී ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්රාමික) මහතා හමුවිය. මෙම හමුවේදී ඉන්දීය සාගර කලාපයේ ආරක්ෂක තත්ත්වය සහ මතුවෙමින් පවතින අභියෝග ජයගැනීමට දෙරට අතර සහයෝගීතාවය ශක්තිමත් කරගැනීම පිළිබඳව දීර්ඝ ලෙස සාකච්ඡා කෙරිණි.
සාගර කලාපීය දැනුවත්භාවය, තොරතුරු හුවමාරුව සහ මානුෂීය ආධාර සැපයීමේදී දෙරට අතර සම්බන්ධීකරණය වැඩිදියුණු කිරීමට මෙහිදී එකඟතාව පළ විය. විශේෂයෙන්ම ශ්රී ලංකාවේ සන්නද්ධ හමුදාවන්හි ධාරිතාව ඉහළ නැංවීම සඳහා ඇමරිකාව විසින් ලබාදීමට නියමිත TH-57 Sea Ranger හෙලිකොප්ටර් යානා 10ක් සහ B-Type Reliance පන්තියට අයත් අඩි 210ක දිගින් යුත් ‘කටර්’ (Cutter) වර්ගයේ යුද නෞකාව පිළිබඳව ආරක්ෂක ලේකම්වරයා සිය කෘතඥතාව පළ කළේය.
නීතිවිරෝධී ජාවාරම් සහ නූතන ආරක්ෂක තර්ජන මැඩපැවැත්වීම සඳහා ශ්රී ලංකාවට අඛණ්ඩ සහයෝගය ලබාදෙන බවට ඇමරිකානු දූත පිරිස මෙහිදී සහතික විය. මෑතකදී දිවයිනට බලපෑ ‘දිත්වා’ සුළි කුණාටු තත්ත්වයේදී ඇමරිකානු රජය ලබාදුන් සහයෝගය ද ආරක්ෂක ලේකම්වරයා විසින් අගය කරන ලදී. ඒකාබද්ධ පුහුණු වැඩසටහන් හරහා දෙරටේ සන්නද්ධ හමුදාවන් අතර සබඳතා තවදුරටත් වර්ධනය කරගැනීමට ද මෙහිදී අවධානය යොමු විය.
මෙම අවස්ථාවට ශ්රී ලංකාවේ ඇමරිකානු තානාපති කාර්යාලයේ ආරක්ෂක උපදේශක ලුතිනන් කර්නල් මැතිව් හවුස් (Matthew House) ඇතුළු නිලධාරීන් පිරිසක් සහභාගී වූහ.g
