2026 ආසියානු නැගී එන කණ්ඩායම් අතර කාන්තා ක්රිකට් තරගාවලියේ පළමු අවසන් පූර්ව තරගයෙන් කඩුලු 5ක ජයක් වාර්තා කළ ඉන්දීය ‘A’ කණ්ඩායම තරගාවලියේ අවසන් මහා තරගය සඳහා සුදුසුකම් ලබා ගැනීමට සමත් විය. ශ්රී ලංකා ‘A’ කණ්ඩායම ලබා දුන් ලකුණු 119ක ඉලක්කය පන්දුවාර 13යි පන්දු 3ක් තුළ කඩුලු 5ක් පමණක් වැය කර හඹා යාමට ඉන්දීය ක්රීඩිකාවෝ සමත් වූහ. මෙම ජයග්රහණයත් සමඟ ඉන්දීය කණ්ඩායම ආසියානු කුසලානය දිනා ගැනීමේ සටනේ ඉදිරියටම පැමිණ සිටී.
කාසියේ වාසිය දිනා පළමුවෙන් පන්දුවට පහරදුන් ශ්රී ලංකා ‘A’ කණ්ඩායමට පන්දුවාර 19යි පන්දු 4ක් අවසානයේ සියලු දෙනා දැවී රැස් කරගත හැකි වූයේ ලකුණු 118ක් පමණි. ඉන්දීය පන්දු යවන්නියන්ගේ ප්රහාරාත්මක පන්දු යැවීම හමුවේ ශ්රී ලංකා පිතිකාරිනියන් දැඩි අපහසුතාවයට පත් වූ අතර, කිසිදු පිතිකාරිනියකට විශාල ලකුණු සංඛ්යාවක් කරා යාමට අවස්ථාවක් හිමි නොවීය. පිළිතුරු ඉනිම ක්රීඩා කළ ඉන්දීය කණ්ඩායම ආරම්භයේ සිටම වේගවත් ලකුණු හඹා යාමක නිරත වෙමින් සිය ජයග්රහණය තහවුරු කර ගත්තේය.
මෙම පරාජයත් සමඟ ශ්රී ලංකා ‘A’ කණ්ඩායමට තරගාවලියෙන් ඉවත් වීමට සිදුවන අතර, තරුණ ක්රීඩිකාවන් ලැබූ මෙම අත්දැකීම අනාගත ජාත්යන්තර තරග සඳහා මහත් පිටුවහලක් වනු ඇත. ඉන්දියාව සහ මීළඟ අවසන් පූර්ව තරගයෙන් ජයගන්නා කණ්ඩායම අතර අවසන් මහා තරගය ඉදිරියේදී පැවැත්වීමට නියමිතය.
