හෙරොයින් සහ අයිස් මත්ද්රව්ය සඳහා ආදේශක ලෙස භාවිත කරනු ලබන මත්පෙති 21,000ක තොගයක් සමඟ 54 හැවිරිදි සැකකරුවෙකු තොටළඟ ප්රදේශයේදී අත්අඩංගුවට ගැනීමට බස්නාහිර දකුණ අපරාධ කොට්ඨාසය සමත්ව තිබේ. ඊයේ (19) පස්වරුවේ සිදුකළ මෙම වැටලීමේදී අත්අඩංගුවට ගත් මත්පෙති තොගයේ වටිනාකම රුපියල් ලක්ෂ 30කට ආසන්න බව පොලිසිය ගණන් බලා ඇත. උපපොලිස් පරීක්ෂක අතුල බාලසූරිය මහතා ඇතුළු නිලධාරීන් කණ්ඩායමක් ග්රෑන්ඩ්පාස් ප්රදේශයේ වැටලීමකට යමින් සිටියදී ලද රහසිගත තොරතුරක් මත මෙම සාර්ථක අත්අඩංගුවට ගැනීම සිදුකර තිබේ.
අදාළ පුද්ගලයා මත්පෙති තොගයක් රැගෙන තොටළඟ ප්රදේශයේ නිවසකට පැමිණෙන බවට ලද තොරතුරකට අනුව පොලිස් නිලධාරීන් එම ස්ථානයේ රැකවල්ලා සිට ඇත. සැකකරුගෙන් සිදුකළ මූලික ප්රශ්න කිරීම්වලදී අනාවරණය වී ඇත්තේ මෙම මත්පෙති විවිධ පුද්ගලයන් වෙත තොග වශයෙන් අලෙවි කිරීම සඳහා සන්තකයේ තබාගෙන සිටි බවයි. මත්ද්රව්යවලට ඇබ්බැහි වූවන් අතර මෙම පෙති වර්ග සඳහා ඉහළ ඉල්ලුමක් පවතින බවත්, ජාවාරම්කරුවන් විසින් මෙය ලාභදායී ව්යාපාරයක් ලෙස පවත්වාගෙන ගොස් ඇති බවත් විමර්ශනවලදී හෙළි වී තිබේ.
අත්අඩංගුවට ගත් සැකකරු ඉදිරි විමර්ශන කටයුතු සඳහා අධිකරණය වෙත ඉදිරිපත් කිරීමට නියමිතය. බස්නාහිර පළාත දකුණ දිසාව අපරාධ කොට්ඨාසය විසින් මෙම ජාලයේ ප්රධාන සැපයුම්කරුවන් කවුරුන්ද යන්න සහ මෙම ජාවාරම පිටුපස සිටින සෙසු පුද්ගලයන් සොයා වැඩිදුර පරීක්ෂණ පවත්වනු ලබයි. මෑත කාලීනව කොළඹ නගරය කේන්ද්ර කරගනිමින් මෙවැනි මත්පෙති ජාවාරම් ඉහළ ගොස් ඇති බවට ලැබී ඇති තොරතුරු මත පොලිසිය සිය වැටලීම් දැඩි කර ඇත.
