ඉන්දීය අග්රාමාත්ය නරේන්ද්ර මෝදි පෙබරවාරි 25 සහ 26 යන දිනවල ඊශ්රායලයේ නිල සංචාරයක නිරත වීමට නියමිතය. මෙය 2017 වසරෙන් පසු ඔහු ඊශ්රායලයට යන පළමු අවස්ථාව වන අතර, බටහිර ඉවුරේ (West Bank) ඊශ්රායල ව්යාප්තිවාදී පියවරයන් ඉන්දියාව විසින් හෙළා දැකීමෙන් පසු සිදුකරන මෙම සංචාරය කෙරෙහි ලෝක අවධානය යොමුව තිබේ.
ඉන්දියාව මෑතකදී රටවල් 100කට අධික සංඛ්යාවක් සමඟ එක්ව බටහිර ඉවුරේ ඊශ්රායල පදිංචිකිරීම් “නීති විරෝධී” බව පවසමින් හෙළා දුටුවේය. ඉන්දියාව සැමවිටම ‘දෙරජ්ය විසඳුම’ (Two-nation solution) වෙනුවෙන් පෙනී සිටින අතර, අරාබි ලීගය සමඟ එක්ව පලස්තීනුවන්ගේ අයිතිවාසිකම් වෙනුවෙන් හඬ නැගීමට ඉන්දියාව කටයුතු කර තිබේ.
ඊශ්රායල අගමැති බෙන්ජමින් නෙතන්යාහු සහ නරේන්ද්ර මෝදි අතර පවතින්නේ ඉතා සමීප පෞද්ගලික මිත්රත්වයකි. “අප වසර ගණනාවක් පුරා ගොඩනඟා ගත් පෞද්ගලික මිතුරන්” ලෙස නෙතන්යාහු පසුගියදා සිය X ගිණුමේ සටහනක් තබමින් මෝදිව අගය කළේය. මැදපෙරදිග කලාපයේ පවතින අර්බුද මැද මෙම මිත්රත්වය ආරක්ෂා කරගනිමින් සිය උපායමාර්ගික අවශ්යතා ඉටුකර ගැනීමට මෝදි උත්සාහ කරනු ඇත.
ආර්ථික විශේෂඥයන් පෙන්වා දෙන්නේ ආරක්ෂක, තාක්ෂණික සහ ආර්ථික ක්ෂේත්රවල ඊශ්රායලය සමඟ සහයෝගීතාව තවදුරටත් ගැඹුරු කර ගැනීම මෝදිගේ අරමුණ බවයි. කෙසේ වෙතත්, ගාසා තීරයේ ගැටුම සම්බන්ධයෙන් මෝදි විසින් නෙතන්යාහු වෙත ඉදිරිපත් කරනු ලබන ස්ථාවරය කුමක්ද යන්න පිළිබඳව ජාත්යන්තරය විමසිල්ලෙන් පසුවෙයි.
