ලොව භයානකම මත්ද්රව්ය ජාවාරම්කරුවෙකු ලෙස සැලකෙන ‘ජලිස්කෝ නිව් ජෙනරේෂන්’ (CJNG) කාටලයේ නායක නෙමේසියෝ ඔසෙගුවේරා සර්වාන්ටේස් හෙවත් “එල් මෙන්චෝ” (El Mencho) ඊයේ (22) මෙක්සිකානු හමුදා මෙහෙයුමකදී ඝාතනය විය. මෙය මෑතකදී ඉන්දීය සහ ජාත්යන්තර මාධ්ය වාර්තා කළේ දශකයකට පසු මෙක්සිකානු මත්ද්රව්ය යුද්ධයේ ලැබූ විශාලතම ජයග්රහණයක් ලෙසයි.
මෙක්සිකෝවේ ජලිස්කෝ ප්රාන්තයේ ටපල්පා (Tapalpa) ප්රදේශයේදී සිදුකළ මෙම හමුදා මෙහෙයුමට ගුවන් හමුදාව සහ විශේෂ බලකාය සම්බන්ධ විය. වෙඩි හුවමාරුවකදී බරපතළ තුවාල ලැබූ එල් මෙන්චෝ, හෙලිකොප්ටර් යානයක් මගින් මෙක්සිකෝ සිටි වෙත රැගෙන යන අතරතුර මියගිය බව එරට ආරක්ෂක අමාත්යාංශය තහවුරු කළේය.
නායකයාගේ මරණයට පළිගැනීමක් ලෙස කාටල් සාමාජිකයන් ප්රාන්ත 20ක පමණ මාර්ග බාධක 250කට අධික සංඛ්යාවක් යොදා ඇති අතර, වාහන සහ ව්යාපාරික ස්ථාන ගිනි තබමින් දැඩි කලබලකාරී තත්ත්වයක් නිර්මාණය කර තිබේ. මේ හේතුවෙන් ජලිස්කෝ ප්රාන්තයේ පාසල් වසා දමා ඇති අතර ගුවන් ගමන් ද රැසක් අවලංගු කර ඇත.
මෙම මෙහෙයුම සඳහා ඇමරිකානු බුද්ධි අංශ සහාය ලබා දී ඇති බව ධවල මන්දිරය තහවුරු කර තිබේ. ජනාධිපතිනි ක්ලෝඩියා ෂෙයින්බෝම් (Claudia Sheinbaum) ට මෙය විශාල දේශපාලන ජයග්රහණයක් වන්නේ, ඇමරිකානු ජනාධිපති ඩොනල්ඩ් ට්රම්ප් විසින් මෙක්සිකෝවට එරෙහිව පනවන බවට තර්ජනය කළ බදු සීමා (Tariffs) ලිහිල් කර ගැනීමට මෙය ප්රබල සාධකයක් විය හැකි බැවිනි.
එල් චැපෝ (El Chapo) සහ එල් මායෝ (El Mayo) වැනි ප්රබල නායකයන් අත්අඩංගුවට පත්වීමෙන් පසු සිදුවූවාක් මෙන්, එල් මෙන්චෝගේ අභාවයත් සමඟ කාටල් කණ්ඩායම් අතර බලය සඳහා අභ්යන්තර ගැටුම් ඇති වීමේ දැඩි අවදානමක් පවතින බව ආරක්ෂක අංශ අනතුරු අඟවයි.
