ශ්රී ලංකා ක්රිකට් කණ්ඩායම හා ක්රීඩකයින් ඉලක්ක කර ගනිමින් සමාජය තුළ පවතින සෘණාත්මක (Negative) ආකල්ප සහ විවේචන ක්රීඩකයන්ගේ මානසික මට්ටමට දැඩි බලපෑමක් එල්ල කරන බව ශ්රී ලංකා සීමිත ඕවර නායක දසුන් ශානක පවසයි.ඔහු මේ බව ප්රකාශ කළේ, ඊයේ (25) නවසීලන්තය සමඟ පැවති විස්සයි20 ලෝක කුසලාන සුපිරි 8 වටයේ තරගයෙන් ශ්රී ලංකාව පරාජයට පත්වීමෙන් අනතුරුව කොළඹ ආර්. ප්රේමදාස ක්රීඩාංගණයේ පැවති මාධ්ය හමුව අමතමිනි.මෙම තීරණාත්මක තරගයේදී නවසීලන්තය ලබාදුන් ලකුණු 169ක ඉලක්කය හඹාගිය ශ්රී ලංකා කණ්ඩායමට පන්දුවාර 20 අවසානයේ කඩුලු 8ක් දැවී ලබාගත හැකිවූයේ ලකුණු 107ක් පමණි. ඒ අනුව ලකුණු 61ක දැවැන්ත පරාජයක් ශ්රී ලංකාවට හිමි වූ අතර, මෙම පරාජයත් සමඟ ශ්රී ලංකාවට ලෝක කුසලාන තරගාවලියෙන් ඉවත් වීමට සිදුවිය.මාධ්යවේදීන් නැගූ ප්රශ්න හමුවේ අදහස් දැක්වූ දසුන් ශානක සඳහන් කළේ, කණ්ඩායමේ ශාරීරික හා මානසික යෝග්යතාව උපරිම මට්ටමක නොමැති බව තමා විශ්වාස කරන බවයි.”ගොඩක් වෙලාවට අපිට අහන්න දකින්න ලැබෙන්නේ නෙගටිව් දේවල්. ක්රීඩකයෝ විදියට අපි පොසිටිව් හිටියත් එළියෙන් නිර්මාණය කරලා තියෙනවා නෙගටිව් පරිසරයක්. ඒක හරි පාඩුවක් ලංකාවේ ක්රිකට්වලට. මං හිතන්නේ නැහැ මේකත් රැකගන්න පුළුවන් කියලා.” යැයි දසුන් පැවසීය.එමෙන්ම තරග පරාජයන් සහ ක්රීඩකයන් ඉලක්ක කරගනිමින් එල්ල වන මෙම සෘණාත්මක ප්රචාරයන් පාලනය කිරීමට බලධාරීන් මැදිහත් විය යුතු බවද ඔහු අවධාරණය කළේය.”මැච් එක ඉවර වෙලා කීදෙනෙක් මයික් අල්ලන් ඉන්නවාද? ඇයි නෙගටිවිටි එක මෙච්චර පතුරවන්නේ. ඒ දේවල් රජයෙන් (Government) හරි මැදිහත් වෙලා නැවැත්තුවොත් මානසික සුවයට ඒක පහසුවක් වෙයි.”තරගයේ තණතීරුව සම්බන්ධයෙන් අදහස් දැක්වූ නායකයා කියා සිටියේ, තණතීරුව පිතිකරණයට හිතකර වනු ඇතැයි අපේක්ෂා කළද, බලාපොරොත්තු නොවූ ආකාරයේ දඟකැවීමක් එහි දක්නට ලැබුණු බවයි. කෙසේ වෙතත්, තරගාවලියේ තවත් එක් තරගයක් ඉතිරිව ඇති බවත්, ලංකාවේ සිටින දක්ෂතම පිතිකරුවන් කණ්ඩායම සතු බැවින් එම තරගය හොඳින් අවසන් කිරීමට බලාපොරොත්තු වන බවත් දසුන් ශානක වැඩිදුරටත් සඳහන් කළේය.
