HSBC හෝල්ඩිංග්ස් සමූහයේ හිටපු සභාපති මෙන්ම වර්තමාන AIA සමූහයේ ස්වාධීන විධායක නොවන සභාපති සහ විධායක නොවන අධ්යක්ෂ ශ්රීමත් මාර්ක් ටකර් මහතා අද (10) කොළඹදී විදේශ අමාත්ය විජිත හේරත් මහතා හමුවී විශේෂ සාකච්ඡාවක නිරත විය. මාර්තු 9 වනදා සිට 10 වනදා දක්වා ශ්රී ලංකාවේ සිදුකළ නිල සංචාරයකට සමගාමීව මෙම හමුව සිදුවී තිබේ.
මෙම සාකච්ඡාවේදී AIA සමූහය ශ්රී ලංකාව තුළ මේ වන විට පවත්වාගෙන යන ව්යාපාරික මෙහෙයුම්වල ප්රගතිය පිළිබඳව මාර්ක් ටකර් මහතා විසින් විදේශ අමාත්යවරයා දැනුවත් කර ඇත. AIA සමූහය ශ්රී ලංකාව තුළ සිය ආයෝජන සහ සේවා ජාලය තවදුරටත් පුළුල් කිරීම සඳහා ඇති හැකියාව පිළිබඳව මෙහිදී අවධානය යොමු වී ඇති අතර, ඒ සඳහා අමාත්ය විජිත හේරත් මහතා විසින් ඔවුන් වෙත විවෘත ආරාධනයක් ද සිදු කර තිබේ.
ශ්රී ලංකාවේ රක්ෂණ හා මූල්ය ක්ෂේත්රය තුළ AIA සමූහය සතු ශක්තිමත් දායකත්වය අගය කළ විදේශ අමාත්යවරයා, මෙරට ආර්ථික වර්ධනයට අවශ්ය විදේශීය ආයෝජන දිරිමත් කිරීමේ රජයේ ප්රතිපත්තිය පිළිබඳව ද මෙහිදී කරුණු පැහැදිලි කළේය. ශ්රීමත් මාර්ක් ටකර් වැනි ජාත්යන්තර මූල්ය ක්ෂේත්රයේ ප්රමුඛයෙකු මෙරට සංචාරයක නිරත වීම ශ්රී ලංකාවේ මූල්ය ස්ථාවරත්වය පිළිබඳව විදේශීය ආයෝජකයින් තුළ ඇති විශ්වාසය තහවුරු කරන්නක් බව ආර්ථික විශ්ලේෂකයෝ පෙන්වා දෙති.
