ජෙෆ්රි එප්ස්ටයින් (Jeffrey Epstein) නමැති ප්රකට ලිංගික අපරාධකරු වෙනුවෙන් ලොව පුරා දැරියන් සහ තරුණියන් බඳවා ගැනීම සඳහා ප්රංශ මොස්තර නිරූපණ නියෝජිතයෙකු වූ ජීන් ලුක් බෲනෙල් (Jean-Luc Brunel) සිය ආයතනය අවභාවිත කර ඇති බවට බ්රසීල කාන්තාවන් පිරිසක් බීබීසී පුවත් සේවය වෙත අලුත් තොරතුරු අනාවරණය කර තිබේ. බෲනෙල් පසුව සිරගෙදරදී සියදිවි නසාගත් අතර, ඔහුට එරෙහිව දූෂණය, ලිංගික අතවර සහ එප්ස්ටයින් වෙනුවෙන් දැරියන් සැපයීම පිළිබඳ බරපතල චෝදනා එල්ල වී තිබුණි. මෙම පරීක්ෂණයේදී හෙළි වී ඇත්තේ දකුණු ඇමරිකානු රටවලින් තරුණියන් සොයාගෙන ඔවුන්ට අමෙරිකාවට යාම සඳහා වීසා බලපත්ර සකස් කර දීමට බෲනෙල් සතු මොස්තර නිරූපණ ආයතන සෘජුවම මැදිහත් වී ඇති බවයි.
වයස අවුරුදු 16දී මෙම ජාලයට හසුවීමට ගිය ග්ලවුසියා ෆෙකෙටේ (Gláucia Fekete) නම් බ්රසීල කාන්තාව පවසන්නේ, නිව්යෝර්ක් හි පැවැත්වෙන මොස්තර නිරූපණ තරඟයකට සහභාගී වන ලෙස පවසමින් බෲනෙල් තම මව පොළඹවා ගැනීමට උත්සාහ කළ බවයි. එප්ස්ටයින් සමඟ සම්බන්ධතාවක් පැවැත්වූ තවත් කාන්තාවක් පවසා ඇත්තේ තමන් කිසිදිනක මොස්තර නිරූපණ ක්ෂේත්රයේ රැකියාවක් නොකළද, ඇයට අමෙරිකාවට පැමිණීම සඳහා වීසා ලබා දී ඇත්තේ බෲනෙල්ගේ ආයතනයක් හරහා බවයි. මෙම හෙළිදරව්වත් සමඟ එප්ස්ටයින් සහ බෲනෙල් එක්ව පවත්වාගෙන ගිය ජාත්යන්තර මිනිස් ජාවාරම් ජාලයේ භයානක තොරතුරු රැසක් ලෝකය හමුවේ යළිත් අනාවරණය වී තිබේ.
