ප්රකට ඇමෙරිකානු රැප් ගායක කන්යේ වෙස්ට් හට (Ye) ඔහුගේ මැලිබු මන්දිරයේ සිදුකළ අලුත්වැඩියා කටයුතුවලට අදාළ වැටුප් නොගෙවීම සම්බන්ධයෙන් වන නඩුවක තීන්දුව ප්රකාශයට පත් කරමින්, අදාළ සේවකයාට ඩොලර් 140,000ක වන්දියක් ගෙවන ලෙස ලොස් ඇන්ජලීස් ජූරි සභාවක් නියෝග කර තිබේ. ටෝනි සැක්සන් (Tony Saxon) නමැති අත් උදව්කරුවෙකු විසින් පවරන ලද මෙම නඩුවේදී ඔහු මුලින් ඩොලර් මිලියන 1.7ක වන්දියක් ඉල්ලා සිටියද, දස දිනක නඩු විභාගයකින් පසුව ජූරි සභාව මෙම වන්දි මුදල සහ නීතිඥ ගාස්තු ගෙවන ලෙස නියෝග කළේය.
නඩු විභාගයේදී අනාවරණය වූ කරුණුවලට අනුව, මෙම මැලිබු මන්දිරය විදුලිය සහ ජලනල පද්ධති රහිතව ‘Off-grid’ මට්ටමට සකස් කිරීමට කන්යේ උත්සාහ කර ඇති අතර, එහි පඩිපෙළ ඉවත් කර ඒ වෙනුවට ලිස්සා යා හැකි ‘ස්ලයිඩයක්’ (Slide) සවි කරන ලෙස ද සැක්සන්ට උපදෙස් දී ඇත. තවද, තමන්ගේ මලමුත්ර පිරිපහදු කර පානීය ජලය සහ ස්නානය සඳහා යොදා ගත හැකි පද්ධතියක් සවි කරන ලෙස ද කන්යේ තමන්ට පැවසූ බව සැක්සන් අධිකරණයේදී සාක්ෂි දෙමින් කියා සිටියේය. මෙහි වැඩ කරන කාලය තුළ තමන්ට කොන්ක්රීට් පොළොවක මෙට්ටයක් මත නිදා ගැනීමට සිදුවූ බවත්, දිනක් අලුයම 3ට තමන්ව අවදි කර වැඩ නොකරන්නේ මන්දැයි කන්යේ විමසූ බවත් ඔහු වැඩිදුරටත් සඳහන් කළේය.
කෙසේ වෙතත්, කන්යේ වෙස්ට්ගේ නීතිඥ කණ්ඩායම මෙම චෝදනා ප්රතික්ෂේප කළ අතර, ඔවුන් තර්ක කළේ සැක්සන් යනු බලපත්ර රහිත කොන්ත්රාත්කරුවෙකු බවත් ඔහු මෙම වාස්තු විද්යාත්මක වටිනාකමකින් යුතු මන්දිරය විනාශ කළ බවත්ය. නඩු විභාගය අතරතුරදී කන්යේ වෙස්ට් අධිකරණයේදී නින්දට වැටී සිටි බවට ද ඇතැම් මාධ්ය වාර්තා පළ වූ නමුත්, ඔහුගේ නීතිඥයා එය ප්රතික්ෂේප කරමින් පවසා සිටියේ ඔහු නින්දට වැටී නොසිටි බවත් මෙම නඩුව ඔහුට කම්මැලි සහ පහත් මට්ටමේ එකක් වූ නිසා ඔහු එසේ සිටි බවත්ය. 2021 වසරේදී ඩොලර් මිලියන 57කට මිලදී ගත් මෙම නිවස, පසුව අලුත්වැඩියා කටයුතු අතහැර දැමීමෙන් අනතුරුව කන්යේ විසින් 2023 වසරේදී විශාල පාඩුවක් සහිතව විකුණා දමන ලදී.
