2026 වසරේ ඇමෙරිකාව, කැනඩාව සහ මෙක්සිකෝව යන රටවල සත්කාරකත්වයෙන් පැවැත්වීමට නියමිත ෆිෆා (FIFA) පාපන්දු ලෝක කුසලානය සඳහා ඉරාන ජාතික කණ්ඩායම සහභාගී වීම “සුදුසු නොවන” බව ඇමෙරිකානු ජනාධිපති ඩොනල්ඩ් ට්රම්ප් ප්රකාශ කර තිබේ. ඉරානය සහ ඇමෙරිකාව අතර පවතින දැඩි දේශපාලනික හා යුදමය නොසන්සුන්තාව හමුවේ, ඉරාන ක්රීඩකයන්ගේ ජීවිත සහ ආරක්ෂාව පිළිබඳව සලකා බැලීමේදී ඔවුන් තරඟාවලියට පැමිණීම උචිත නොවන බව ට්රම්ප් සිය ‘Truth Social’ ගිණුම හරහා අවධාරණය කර ඇත.
මේ අතර ඉරාන ක්රීඩා අමාත්ය අහමඩ් දොන්යමාලි (Ahmad Donyamali) පවසා ඇත්තේ “කිසිදු තත්ත්වයක් යටතේ” සිය රට මෙවර ලෝක කුසලානයට සහභාගී නොවන බවයි. ඇමෙරිකාව විසින් ඉරාන නායකයන් ඉලක්ක කර ගනිමින් සිදුකරන ප්රහාර සහ දෙරට අතර පවතින ගැටුම්කාරී තත්ත්වය හමුවේ මෙවැනි තීරණයක් ගත් බව ඔහු රජයේ රූපවාහිනිය හරහා ප්රකාශ කර තිබේ. ඉරානය මෙවර ලෝක කුසලානය සඳහා සුදුසුකම් ලබා සිටින්නේ ‘G’ කාණ්ඩය යටතේ බෙල්ජියම, ඊජිප්තුව සහ නවසීලන්තය සමඟ තරඟ වැදීමටයි.
විශේෂත්වය වන්නේ ඉරානය සහභාගී වීමට නියමිතව තිබූ කාණ්ඩයේ සියලුම තරඟ ඇමෙරිකාවේ ලොස් ඇන්ජලීස් සහ සීඇට්ල් යන නගරවල පැවැත්වීමට සැලසුම් කර තිබීමයි. මීට පෙර ෆිෆා සභාපති ජියානි ඉන්ෆැන්ටිනෝ ප්රකාශ කර තිබුණේ ඉරානයට තරඟාවලියට සහභාගී වීමට අවසර දෙන බවට ට්රම්ප් තමන්ට සහතික වූ බවයි. කෙසේ වෙතත්, දෙරටේ නායකයන්ගේ මෙම නවතම ප්රකාශයන් නිසා ඉරානය ලෝක කුසලානයට සහභාගී වීම පිළිබඳව මේ වන විට දැඩි අවිනිශ්චිතතාවක් මතු වී තිබේ.
