ඉන්දියාවේ කේරළ ප්රාන්තයේ තිරිසූර් (Thrissur) දිස්ත්රික්කයේ වෙල්ලරක්කාඩ් ප්රදේශයේදී නිවසකට කඩා වැදුණු අයාලේ යන සුනඛයෙකු එල්ල කළ දරුණු ප්රහාරයකින් 84 හැවිරිදි වියපත් මවක් ජීවිතක්ෂයට පත්වී ඇති අතර ඇයගේ 60 හැවිරිදි ආබාධිත පුත්රයා අසාධ්ය තත්ත්වයෙන් රෝහල්ගත කර තිබේ. පසුගිය වසර කිහිපය පුරාම රෝගීව එක්තැන්ව සිටි මෙම කාන්තාව, පසුගිය බ්රහස්පතින්දා සවස 6ට පමණ විවෘතව තිබූ ඉදිරිපස දොරෙන් නිවස තුළට පැමිණි සුනඛයාගේ ප්රහාරයට ලක්ව ඇත.
ප්රහාරය හේතුවෙන් ඇයගේ මුහුණට බරපතල හානි සිදුව තිබූ අතර, රෝහලට රැගෙන යාමට පෙරම ඇය මියගොස් ඇති බව වාර්තා වේ. ඇයගේ පුත්රයා ද එම අවස්ථාවේදී සුනඛයාගේ ප්රහාරයට ලක්ව ඇති අතර, ඔහු දැනට අසාධ්ය තත්ත්වයෙන් ප්රතිකාර ලබමින් සිටියි. මීට අමතරව එම ප්රදේශයේ සිටි තවත් අයෙකුට ද මෙම සුනඛයා සපා කා ඇති අතර පසුව ප්රදේශවාසීන් එක්ව එම සුනඛයා අල්ලා මරා දමා තිබේ.
කේරළයේ අයාලේ යන සුනඛ තර්ජනය පිළිබඳව මහජනතාව තුළ දැඩි කනස්සල්ලක් පවතින පසුබිමක මෙම අවාසනාවන්ත සිදුවීම වාර්තා වී ඇත. මියගිය කාන්තාවගේ දේහය පශ්චාත් මරණ පරීක්ෂණ කටයුතු සඳහා යොමු කර ඇති අතර පොලිසිය මේ පිළිබඳව වැඩිදුර විමර්ශන පවත්වයි.
