දිවයිනේ ප්රදේශ කිහිපයකට ඉදිරි පැය 36 ක කාලය තුළ තද වැසි සහ ගිගුරුම් සහිත වැසි ඇති විය හැකි බව කාලගුණ විද්යා දෙපාර්තමේන්තුව නිවේදනය කරයි. අද රාත්රී කාලයේදී බස්නාහිර, සබරගමුව සහ වයඹ පළාත්වලටත් ගාල්ල, මාතර, මහනුවර සහ නුවරඑළිය දිස්ත්රික්කවලටත් වැසි හෝ ගිගුරුම් සහිත වැසි ඇති විය හැක. විශේෂයෙන්ම බස්නාහිර සහ සබරගමුව පළාත්වලත්, ගාල්ල සහ මාතර දිස්ත්රික්කවලත් ඇතැම් ස්ථානවලට මිලිමීටර් 50 ඉක්මවූ තද වැසි ඇතිවීමේ හැකියාවක් පවතී.
හෙට (14) දිනයේ කාලගුණ තත්ත්වය පිළිබඳව පුරෝකථනය කරමින් දෙපාර්තමේන්තුව පවසන්නේ සබරගමුව, මධ්යම සහ ඌව පළාත්වලත්, ගාල්ල සහ මාතර දිස්ත්රික්කවලත් පස්වරු කාලයේදී වැසි අපේක්ෂා කළ හැකි බවයි. නැගෙනහිර පළාතේ මෙන්ම පොළොන්නරුව සහ හම්බන්තොට දිස්ත්රික්කවල ද ස්ථාන කිහිපයක වැසි ඇති විය හැකි අතර දිවයිනේ සෙසු ප්රදේශවල ප්රධාන වශයෙන් සාමාන්ය කාලගුණික තත්ත්වයක් පවතිනු ඇත. මීට අමතරව, හෙට උදෑසන කාලයේදී මධ්යම, සබරගමුව සහ ඌව පළාත්වල මෙන්ම ගාල්ල සහ මාතර දිස්ත්රික්කවල ඇතැම් ස්ථානවල මීදුම් සහිත තත්ත්වයක් දැකගත හැකි වනු ඇත.
ගිගුරුම් සහිත වැසි ඇති වන අවස්ථාවලදී එම ප්රදේශවල තාවකාලිකව තද සුළං ඇති විය හැකි බැවින් සහ අකුණු මගින් සිදුවන අනතුරු අවම කර ගැනීමට අවශ්ය පූර්ව ආරක්ෂක පියවර ගන්නා ලෙස කාලගුණ විද්යා දෙපාර්තමේන්තුව මහජනතාවගෙන් කාරුණිකව ඉල්ලා සිටියි.
