ශ්රී ලංකා පරිපාලන සේවයේ ජ්යෙෂ්ඨ නිලධාරියකු වන සුනිල් ගලගම මහතා බදුල්ල දිස්ත්රික්කයේ නව දිසාපති (දිස්ත්රික් ලේකම්) ලෙස අද (මාර්තු 14) සිය රාජකාරි කටයුතු ආරම්භ කළේය. වසර 2000 දී පරිපාලන සේවයට එක් වූ ඒ මහතා, වසර 25කට අධික කාලයක් රාජ්ය සේවයේ විවිධ වගකිවයුතු තනතුරු රැසක් හොබවා ඇති අත්දැකීම් බහුල නිලධාරියෙකි.
විදේශ සම්පත් දෙපාර්තමේන්තුවේ සහකාර අධ්යක්ෂවරයා ලෙස සිය වෘත්තීය ගමන් මග ආරම්භ කළ සුනිල් ගලගම මහතා, නීතිය හා සාමය පිළිබඳ අමාත්යාංශය, ආගමන විගමන දෙපාර්තමේන්තුව සහ අබුඩාබි තානාපති කාර්යාලයේ නියෝජ්ය තානාපතිවරයා ලෙස ද සේවය කර ඇත. මීට අමතරව කොළඹ සහ දෙහිවල-ගල්කිස්ස යන මහ නගර සභාවල නාගරික කොමසාරිස්වරයා ලෙස කටයුතු කරමින් නාගරික පරිපාලනය පිළිබඳව ද පුළුල් පළපුරුද්දක් ඔහු සතුය.
බදුල්ල දිසාපති ලෙස පත්වීමට පෙර ඔහු සෞඛ්ය හා ජනමාධ්ය අමාත්යාංශයේ අතිරේක ලේකම්වරයා (සංවර්ධන) ලෙස කටයුතු කළේය. බදුල්ල දිස්ත්රික්කයේ සංවර්ධන කටයුතු සහ රාජ්ය පරිපාලන යාන්ත්රණය වඩාත් කාර්යක්ෂම කිරීම කෙරෙහි ඔහුගේ මෙම නව පත්වීම බෙහෙවින් ඉවහල් වනු ඇති බව දිස්ත්රික් ලේකම් කාර්යාල ආරංචි මාර්ග පවසයි.
