ශ්රී ලංකා ක්රිකට් ක්රීඩාවේ අනාගතය වෙනුවෙන් දක්ෂ වේග පන්දු යවන්නන් සොයා යාමේ අරමුණින් ලසිත් මාලිංග සංවිධානය කළ ‘Pace Hunt’ (වේග පන්දු දඩයම) වැඩමුළුවේ පළමු අදියර ඊයේ (14) කොළඹදී සාර්ථකව නිමාවට පත් විය. වයස අවුරුදු 17ත් 22ත් අතර ක්රීඩකයන් ඉලක්ක කරගත් මෙම වැඩසටහන සඳහා 3,500කට අධික පිරිසක් ලියාපදිංචි වී සිටි අතර, ඉන් තෝරාගත් ක්රීඩකයන් පිරිසක් ඊයේ සිය දක්ෂතා ප්රදර්ශනය කළහ.
කෙසේ වෙතත්, වැඩමුළුව අවසානයේ සිය නිල මුහුණුපොත (Facebook) ඔස්සේ සටහනක් තබමින් ලසිත් මාලිංග සිය යම් කලකිරීමක් ප්රකාශ කර තිබුණි. ඔහු අපේක්ෂා කළේ පැයට කිලෝමීටර් 135කට (135 kmph) වඩා වැඩි වේගයකින් පන්දු යවන ක්රීඩකයන් සොයා ගැනීමට වුවත්, ඊයේ දිනයේ වාර්තා වූ උපරිම වේගය වූයේ පැයට කිලෝමීටර් 126ක් පමණි. මේ පිළිබඳව අදහස් දක්වමින් මාලිංග පවසා ඇත්තේ “එහෙම අය නැතිවෙන්න විදියක් නෑ, මම කොහොමහරි හොයාගන්නවා” යනුවෙනි.
මෙම වැඩමුළුව අදියර 10කින් සමන්විත වන අතර, ඉදිරියේදී තවත් අදියර 09ක් දිවයිනේ විවිධ ප්රදේශ ආවරණය වන පරිදි පැවැත්වීමට නියමිතය. අවසානයේදී තෝරා ගන්නා දක්ෂතම ක්රීඩකයන් 20 දෙනා හට ශ්රී ලංකා ක්රිකට් වේග පන්දු ඇකඩමිය හරහා වෘත්තීය ක්රිකට් ක්රීඩකයෙකු වීමේ සෘජු මාවත විවෘත වේ. අතීතයේ මාලිංග වැනි ක්රීඩකයන් බිහි වූයේද මෙවැනි ‘වේග පන්දු දඩයම්’ (Pace Contests) හරහා බැවින්, ඉදිරි අදියරයන්හිදී හෝ තමන් අපේක්ෂා කරන වේගය සහිත ක්රීඩකයන් හමුවනු ඇතැයි මාලිංග දැඩි විශ්වාසයකින් පසුවේ.
