අමෙරිකානු ජනාධිපති ඩොනල්ඩ් ට්රම්ප් ඊයේ (15) ප්රකාශ කළේ හෝමුස් සමුද්ර සන්ධියේ (Strait of Hormuz) ආරක්ෂාව තහවුරු කිරීම සහ නාවික ගමනාගමනය විවෘතව තැබීම සඳහා යුද නැව් එවන්නැයි තමන් රටවල් 7කින් ඉල්ලා සිටි බවයි. ෆ්ලොරිඩාවේ සිට වොෂින්ටන් බලා පැමිණෙන අතරතුර ‘එයාර් ෆෝස් වන්’ (Air Force One) යානයේ සිට මාධ්ය වෙත අදහස් දක්වමින් ඔහු කියා සිටියේ, චීනය වැනි රටවල් සිය තෙල් අවශ්යතාවයෙන් 90%ක්ම ලබාගන්නේ මෙම කලාපයෙන් බැවින් ඔවුන් සිය ආරක්ෂාව තමන් විසින්ම සලසා ගත යුතු බවයි.
බ්රිතාන්යය, ප්රංශය, ජපානය, දකුණු කොරියාව සහ චීනය වැනි රටවලින් මෙම ඉල්ලීම සිදු කර ඇති නමුත්, බොහෝ රටවල් මේ දක්වා නිශ්චිත එකඟතාවක් පළ කර නොමැත. බ්රිතාන්ය අගමැති කීර් ස්ටාමර් (Keir Starmer) සිය ගුවන් යානා වාහක නෞකා අනතුරුදායක කලාපයට එවීම ප්රතික්ෂේප කර ඇති අතර, ට්රම්ප් එයට ප්රතිචාර දක්වමින් කියා සිටියේ සහයෝගය දුන්නත් නැතත් අමෙරිකාව මෙය මතක තබා ගන්නා බවයි. මේ අතර, ජාත්යන්තර බලශක්ති ඒජන්සිය (IEA) ඉතිහාසයේ විශාලතම හදිසි තෙල් තොගය (බැරල් මිලියන 412ක්) වෙළඳපොළට මුදා හැරීමට තීරණය කර ඇත්තේ ඉහළ යන තෙල් මිල පාලනය කිරීමටයි.
යුද්ධයේ වත්මන් තත්ත්වය පිළිබඳව තොරතුරු වාර්තා කරමින් ඉරාන විදේශ අමාත්ය අබ්බාස් අරග්චි (Abbas Araghchi) කියා සිටියේ, අමෙරිකාව සහ එහි මිත්ර පාර්ශවයන් හැර අනෙකුත් රටවලට සමුද්ර සන්ධිය විවෘත බවයි. කෙසේ වෙතත්, ඉරානය විසින් එල්ල කරන ලද මිසයිල සහ ඩ්රෝන ප්රහාර හේතුවෙන් ඩුබායි ගුවන් තොටුපළේ මෙහෙයුම් ද තාවකාලිකව අත්හිටුවා තිබේ. ඉරානය, ඊශ්රායලය, ලෙබනනය සහ ගල්ෆ් කලාපය පුරා සිදුවන මෙම දරුණු ගැටුම්වලින් මේ වන විට සිවිල් වැසියන් දහස් ගණනක් මියගොස් ඇති අතර ලක්ෂ සංඛ්යාත පිරිසක් අවතැන් වී ඇත.
