අමෙරිකානු ජනාධිපති ඩොනල්ඩ් ට්රම්ප් ඊයේ (2026 මාර්තු 15) ප්රකාශ කළේ අමෙරිකාව සහ කියුබාව අතර පවතින දීර්ඝකාලීන අර්බුදකාරී තත්ත්වය සමනය කර ගැනීමට ඉක්මනින්ම එකඟතාවයකට පැමිණීමට හෝ වෙනත් පියවරක් ගැනීමට සූදානම් බවයි. ෆ්ලොරිඩාවේ සිට වොෂින්ටන් බලා එයාර් ෆෝස් වන (Air Force One) යානයෙන් ගමන් කරමින් සිටියදී මාධ්යවේදීන් ඇමතූ ට්රම්ප් සඳහන් කළේ, “කියුබාව ද ගනුදෙනුවකට කැමැත්තෙන් සිටින අතර, අපට කළ යුතු දේ කිරීමට පෙර මුලින්ම ඉරානය පිළිබඳ ප්රශ්නය විසඳාගත යුතු” බවයි.
දශක ගණනාවක සම්බාධක, රාජ්යතාන්ත්රික ගැටුම් සහ සංක්රමණික ගැටලු හේතුවෙන් වොෂින්ටනය සහ හවානා පාලනය අතර දැඩි නොසන්සුන්තාවයක් පවතින පසුබිමක ට්රම්ප්ගේ මෙම ප්රකාශය කලාපීය ආයෝජකයින්ගේ දැඩි අවධානයට ලක්ව තිබේ. කියුබානු ජනාධිපති මිගෙල් ඩයස්-කැනෙල් ද ඉකුත් සිකුරාදා තහවුරු කළේ සිය රට මුහුණ දී සිටින දරුණු ආර්ථික අර්බුදය හමුවේ අමෙරිකාව සමඟ සාකච්ඡා ආරම්භ කර ඇති බවයි. ද්විපාර්ශ්වික මතභේද සාකච්ඡා මාර්ගයෙන් විසඳා ගැනීමටත්, ගැටුම්කාරී වාතාවරණයෙන් බැහැර වීමටත් තමන් අපේක්ෂා කරන බව ඔහු රජයේ රූපවාහිනිය ඔස්සේ ප්රකාශ කළේය.
කියුබාව මේ වන විට ඉතිහාසයේ දරුණුතම බලශක්ති අර්බුදයකට මුහුණ දී සිටින අතර, ආනයනික තෙල් සැපයුම අඩාල වීම නිසා විදුලි බලාගාර සහ ප්රවාහන පද්ධතිය සම්පූර්ණයෙන්ම පාහේ අඩපණ වී ඇත. මෙවැනි තත්ත්වයක් තුළ ට්රම්ප් මීට පෙර සඳහන් කළේ කියුබාව “මිත්රශීලී ලෙස අත්පත් කර ගැනීමක්” (friendly takeover) සිදුවිය හැකි බවයි. කෙසේ වෙතත්, කියුබානු නායකයින් අවධාරණය කරන්නේ ඕනෑම සාකච්ඡාවක් සිය රටේ ස්වාධීනත්වයට ගරු කරමින් සිදුවිය යුතු බවයි. අමෙරිකානු බලධාරීන් පෙන්වා දෙන්නේ කියුබාවට පනවා ඇති පීඩනය ලිහිල් කිරීමට නම් හවානා පාලනයෙන් දේශපාලනික සහ ආර්ථික ප්රතිසංස්කරණ සිදුවිය යුතු බවයි.
