බංග්ලාදේශ ක්රිකට් පාලක මණ්ඩලයේ (BCB) අභ්යන්තර කටයුතු සඳහා රජය මැදිහත් වුවහොත් ජාත්යන්තර ක්රිකට් කවුන්සිලය (ICC) විසින් එරට ක්රිකට් තහනම් කිරීමේ දැඩි අවදානමක් පවතින බවට බංග්ලාදේශ ක්රිකට් බලධාරීන් අනතුරු අඟවයි. පසුගිය වසරේ පැවැති ක්රිකට් නිලවරණයේදී සිදුවූ බව කියන දූෂණ සහ අක්රමිකතා විමර්ශනය කිරීම සඳහා ක්රීඩා අමාත්යාංශය විසින් පංච පුද්ගල පරීක්ෂණ කමිටුවක් පත් කිරීමට එරෙහිව පාලක මණ්ඩලය මෙම ප්රකාශය සිදු කර තිබේ. රජයේ මෙම තීරණය ජාත්යන්තර ක්රිකට් කවුන්සිලයේ නීති රීති උල්ලංඝනය කිරීමක් ලෙස අර්ථකථනය විය හැකි බවත්, මීට පෙර ශ්රී ලංකාව සහ සිම්බාබ්වේ වැනි රටවලට ද මෙවැනිම හේතූන් මත ක්රිකට් තහනමකට මුහුණ දීමට සිදු වූ බවත් ඔවුන් සිහිපත් කර දෙයි.
මෙම අර්බුදයට මූලික වී ඇත්තේ වත්මන් සභාපති අමිනුල් ඉස්ලාම් මහතා තේරී පත් වූ නිලවරණයේදී බලය අයුතු ලෙස භාවිත කළ බවට සහ ඡන්ද ක්රියාවලියට බලපෑම් කළ බවට හිටපු නායක තමීම් ඉක්බාල් ඇතුළු පිරිසක් එල්ල කළ චෝදනායි. මෙම චෝදනා විමර්ශනය කිරීම සඳහා ක්රීඩා අමාත්යාංශය විසින් ජාතික ක්රීඩා සභාවට (NSC) උපදෙස් දී ඇති අතර, බංග්ලාදේශ ක්රිකට් පාලක මණ්ඩලය පවසන්නේ මෙම පරීක්ෂණ කමිටුව වහාම අහෝසි කළ යුතු බවයි. එසේ නොමැති වුවහොත් බංග්ලාදේශ ක්රිකට් ක්රීඩාවේ ස්ථාවරත්වය සහ ජාත්යන්තර පිළිගැනීම දැඩි ලෙස අනතුරේ වැටෙනු ඇති බව පාලක මණ්ඩලය නිකුත් කළ නිවේදනයේ සඳහන් වේ.
මේ අතර, නිලවරණයෙන් පසු ඩකාහි ප්රධාන ක්රිකට් සමාජ රැසක් වත්මන් පාලක මණ්ඩලය “නීති විරෝධී” ලෙස නම් කර ඇති අතර, ඔවුන් 2025-26 තරග වාරය වර්ජනය කිරීමට ද තීරණය කර ඇත. මෙම දේශපාලන මැදිහත්වීම සහ අභ්යන්තර ගැටුම් හේතුවෙන් බංග්ලාදේශයට ලෝක ක්රිකට් පිටියේ පැනවිය හැකි විනය ක්රියාමාර්ග පිළිබඳව මේ වන විට ක්රීඩා ලෝලීන් අතර දැඩි කතාබහක් නිර්මාණය වී තිබේ.
