හැටන් – නුවරඑළිය ප්රධාන මාර්ගයේ, නානුඔය, රදැල්ල කෙටි මාර්ගයේදී ඊයේ (16) පස්වරුවේ සිදුවීමට ගිය බරපතල අනතුරක් රියදුරුගේ ක්ෂණික සහ බුද්ධිමත් තීරණයක් හේතුවෙන් වළක්වා ගැනීමට හැකි වී තිබේ. ධාවනය වෙමින් තිබූ ලොරි රථයක තිරිංග (Brakes) හදිසියේ අක්රිය වීම මෙම අනතුරට හේතුවී ඇති බව වාර්තා වේ.
තිරිංග අක්රිය වීමත් සමඟ ලොරි රථය පාලනය කර ගැනීමට නොහැකි වූ අවස්ථාවේදී, එය මාරක අනතුරක් දක්වා වර්ධනය වීමට ඉඩ නොතබා රියදුරා විසින් ආරක්ෂිත පියවරක් ලෙස රථය පස් කණ්ඩියක ගැටීමට සලස්වා නතර කර ගැනීමට කටයුතු කර ඇත. මෙම ක්රියාව හේතුවෙන් සිදුවීමට ගිය විශාල විනාශයක් වැළකී ගිය අතර, රියදුරාට හෝ වෙනත් අයෙකුට බරපතල තුවාල සිදුවී නොමැති බව ප්රදේශයේ වාර්තා සඳහන් කරයි.
රදැල්ල කෙටි මාර්ගය යනු අධික බෑවුම් සහිත සහ අවදානම් සහිත මාර්ගයක් බැවින් මෙවැනි කාර්මික දෝෂයන් මාරක අනතුරු වලට මඟ පෑදිය හැකිය. රියදුරුගේ මෙම ආරක්ෂිත පියවර හේතුවෙන් ජීවිත හානි රැසක් වැළකී ගිය අතර, අනතුරට පත් ලොරි රථයට යම් හානි සිදුවී තිබේ. සිද්ධිය සම්බන්ධයෙන් නානුඔය පොලිසිය වැඩිදුර විමර්ශන පවත්වයි.
