අමෙරිකාව පැනවූ දැඩි තෙල් සම්බාධක හමුවේ කියුබාව පුරා පවතින සම්පූර්ණ විදුලි බිඳවැටීමක් මධ්යයේ, එම රට අත්පත් කරගැනීමේ “ගෞරවය” තමන්ට හිමිවන බව අමෙරිකානු ජනාධිපති ඩොනල්ඩ් ට්රම්ප් පවසයි. ධවල මන්දිරයේදී මාධ්ය අමතමින් ඔහු කියා සිටියේ කියුබාව මේ වන විට ඉතා දුර්වල ජාතියක් බවත්, එය “නිදහස් කිරීමට හෝ අත්පත් කරගැනීමට” තමන්ට ඕනෑම බලයක් ඇති බවත්ය.
කියුබාවේ ප්රධානතම බලශක්ති සැපයුම්කරුවා වූ වැනියුලානු ජනාධිපති නිකොලස් මදුරෝ පසුගිය ජනවාරි මාසයේදී අත්අඩංගුවට ගැනීමෙන් පසු, අමෙරිකාව කියුබාව වෙත එල්ල කරන පීඩනය උපරිම කර ඇත. වැනියුලාවෙන් ලැබෙන තෙල් නැව්ගත කිරීම් නතර කර ඇති ට්රම්ප් පාලනය, කියුබාවට තෙල් විකුණන ඕනෑම රටකට එරෙහිව දැඩි බදු පනවන බවට ද අනතුරු අඟවා තිබේ. මෙම බලශක්ති අර්බුදය හමුවේ කියුබාවේ යල් පැන ගිය විදුලි පද්ධතිය මේ වන විට සම්පූර්ණයෙන්ම අකර්මණ්ය වී ඇත.
නිල නොවන වාර්තා සඳහන් කරන්නේ කියුබානු ජනාධිපති මිගෙල් ඩයස්-කැනෙල් පාලනයෙන් ඉවත් කරන ලෙස අමෙරිකානු නිලධාරීන් බලපෑම් කරමින් සිටින බවයි. අමෙරිකානු රාජ්ය ලේකම් මාර්කෝ රුබියෝ ද කියුබාවේ පාලන තන්ත්රය වෙනස් විය යුතු බවට දැඩි ස්ථාවරයක පසුවෙයි. මීට පෙර මෙය “මිත්රශීලී අත්පත් කරගැනීමක්” වනු ඇතැයි ට්රම්ප් පැවසුවද, වත්මන් ප්රකාශය අනුව එය මිත්රශීලී එකක් නොවීමේ ඉඩකඩ වැඩි බව පෙනෙන්නට තිබේ. කෙසේ වෙතත්, කියුබානු ජනාධිපතිවරයා අවධාරණය කර ඇත්තේ ඕනෑම සාකච්ඡාවක් දෙරටේ ස්වෛරීභාවයට ගරු කරමින් සිදු විය යුතු බවයි.
