දශක ගණනාවක නොසලකා හැරීමෙන් පසුව, කැනඩාව සිය උත්තර ධ්රැවීය (Arctic) කලාපය නවීකරණය කිරීම සඳහා බිලියන ගණනක ආයෝජනයක් සහිත ‘දේශය ගොඩනැගීමේ’ (Nation-building) නව පනතක් සම්මත කර තිබේ. ඇමරිකානු ජනාධිපති ඩොනල්ඩ් ට්රම්ප් විසින් පනවන ලද වෙළඳ බදු හමුවේ කැනේඩියානු ආර්ථිකය ශක්තිමත් කිරීම සහ උතුරු දේශසීමාවේ ස්වෛරීභාවය තහවුරු කිරීම නව අග්රාමාත්ය මාර්ක් කාර්නිගේ (Mark Carney) මෙම සැලසුමේ මූලික අරමුණයි. ටෙක්සාස් ප්රාන්තය මෙන් හය ගුණයක විශාලත්වයකින් යුත් මෙම ප්රදේශය මාර්ග, වරාය සහ බලශක්ති ප්රභවයන්ගෙන් තොරව මෙතෙක් හුදකලාව පැවතිණි.
මෙම ව්යාපෘතිය යටතේ ප්රධාන මාර්ග දෙකක් ඉදිකිරීමට රජය තීරණය කර ඇති අතර ඉන් එකක් වන්නේ ‘ග්රේස් බේ’ (Grays Bay) ආර්ථික සහ ආරක්ෂක මංතීරුවයි. එමඟින් කැනඩාවේ උතුරු ප්රදේශයේ පිහිටි පතල් කර්මාන්තය දකුණු දිග ප්රදේශ සමඟ සම්බන්ධ කෙරෙන අතර ගැඹුරු මුහුදු වරායක් ද ඉදිකිරීමට නියමිතය. අනෙක් මාර්ගය වන්නේ මැකෙන්සි නිම්න මහා මාර්ගය (Mackenzie Valley highway) දීර්ඝ කිරීමයි. දේශගුණික විපර්යාස හේතුවෙන් දැනට පවතින ‘අයිස් මාර්ග’ (Ice roads) දියවී යාම නිසා ආහාර සහ ද්රව්ය සැපයීමේ දුෂ්කරතාවලට මුහුණ දී සිටින උතුරුදිග ප්රජාවට මෙමඟින් විශාල සහනයක් ලැබෙනු ඇත.
මෙම සංවර්ධන කටයුතු සඳහා කැනේඩියානු ඩොලර් මිලියන 175කට අධික මුදලක් වෙන් කර ඇති අතර, එය 1800 ගණන්වල කැනඩාව හරහා දුම්රිය මාර්ගයක් ඉදිකර රට එක්සේසත් කළ අවස්ථාවට සමාන ඓතිහාසික පියවරක් ලෙස බලධාරීහු හඳුන්වති. කෙසේ වෙතත්, ඉතා කුඩා ජනගහනයක් වෙසෙන මෙම අතිවිශාල ප්රදේශය තුළ මෙවැනි දැවැන්ත ව්යාපෘති ක්රියාත්මක කිරීමේදී පිරිවැය සහ ප්රායෝගික අවශ්යතා පිළිබඳව විවිධ දේශපාලන විචාරකයෝ තර්ක කරති. කැනඩාවේ උතුරු දේශසීමා ආරක්ෂාව සහ සම්පත් පරිභෝජනය වෙනුවෙන් මෙම ආයෝජනය අත්යවශ්ය බව රජයේ ස්ථාවරයයි.
