එලොන් මස්ක් (Elon Musk) විසින් “විනාශයට ඔරොත්තු දෙන” (apocalypse-proof) ලෙස හඳුන්වා දුන් ටෙස්ලා සයිබර්ට්රක් රථ සම්බන්ධයෙන් දැනට වාර්තා වී ඇති බිහිසුණු අනතුරු මාලාව පිළිබඳව ජාත්යන්තර මාධ්ය දැඩි අවධානයක් යොමු කර තිබේ. පසුගිය වසර දෙකක කාලය තුළ පමණක් මෙම රථවල සිදුවූ ගිනි ගැනීම් 5ක් වාර්තා වී ඇති අතර, ඉන් පුද්ගලයන් හතර දෙනෙකු ජීවිතක්ෂයට පත්ව ඇත. මෙම අනතුරුවලින් මියගිය අයගේ පවුල් පවසන්නේ රථයේ ඇති වැරදි නිර්මාණ සැලසුම් (faulty design) හේතුවෙන් මගීන්ට ඉන් ඉවත් වීමට නොහැකි වී ඔවුන් පණපිටින් පිළිස්සී මියගිය බවයි.
ටෙක්සාස් ප්රාන්තයේ සිදුවූ එක් අනතුරකදී, 47 හැවිරිදි මයිකල් ෂීහාන් (Michael Sheehan) නැමති පුද්ගලයාගේ සිරුර හඳුනාගත නොහැකි වන තරමට පිළිස්සී තිබූ අතර, එහි උෂ්ණත්වය සෙල්සියස් අංශක 2,760ක් (ෆැරන්හයිට් 5,000) තරම් ඉහළ අගයක් ගත් බව අධිකරණ වාර්තා පෙන්වා දෙයි. මෙම රථවල පිටතින් විවෘත කිරීමට දොර හැඬල නොමැති වීම සහ විදුලිය විසන්ධි වූ විට ඇතුළතින් දොර විවෘත කිරීමේ ක්රියාවලිය අතිශය සංකීර්ණ වීම මාරාන්තික අනතුරුවලට ප්රධාන හේතුව වී ඇත. තවද, මෙහි ඇති ශක්තිමත් වීදුරු (laminated windows) බිඳ දැමීමට පවා දැඩි අපහසුතාවයක් පවතින බැවින්, ගිනි ගන්නා අවස්ථාවකදී මගීන් මුදා ගැනීම ගලවා ගැනීමේ කණ්ඩායම්වලට පවා අභියෝගයක් වී තිබේ.
කැලිෆෝනියාවේ සිදුවූ තවත් අනතුරකින් විශ්වවිද්යාල සිසුන් තිදෙනෙකු මියගිය අතර, ඔවුන්ගේ මිතුරෙකු පිටත සිට ඔවුන් බේරා ගැනීමට උත්සාහ කළත් දොරවල් විවෘත කර ගැනීමට නොහැකි වූ බව පවසා ඇත. මේ වන විට ටෙස්ලා සමාගමට එරෙහිව මරණීය අනතුරු සම්බන්ධයෙන් නඩු කිහිපයක්ම ගොනු කර ඇති අතර, ඇමරිකානු රථවාහන ආරක්ෂක අධිකාරිය (NHTSA) ද මේ පිළිබඳව විමර්ශන ආරම්භ කර තිබේ. එලොන් මස්ක් මෙම රථය වෙඩි නොවදින සහ අතිශය ආරක්ෂිත එකක් ලෙස ප්රචාරය කළද, සැබෑ ලෝකයේදී එය “මරණ උගුලක්” වී ඇති බවට විවිධ ආරක්ෂක විශේෂඥයෝ අනතුරු අඟවති.
