මැදපෙරදිග කලාපයේ ශීඝ්රයෙන් වර්ධනය වන යුදමය සහ ආරක්ෂක තත්ත්වය සැලකිල්ලට ගනිමින්, හොංකොං රාජ්යයේ ප්රධාන ගුවන් සේවය වන කැතේ පැසිෆික් (Cathay Pacific), ඩුබායි සහ රියාද් වෙත ක්රියාත්මක කරන සියලුම ගුවන් ගමන් වාර වහාම ක්රියාත්මක වන පරිදි අත්හිටුවා තිබේ. මෙම තීරණය අවම වශයෙන් එළඹෙන අප්රේල් 30 වන දින දක්වා බලපැවැත්වෙන බව එම ගුවන් සේවය අද (19) නිවේදනය කළේය.
කලාපීය “වර්ධනය වන තත්ත්වය” (developing situation) මීට හේතුවී ඇති බවත්, මගීන්ගේ සහ කාර්ය මණ්ඩලයේ ආරක්ෂාව තමන්ගේ ප්රමුඛතම වගකීම බවත් ගුවන් සමාගම අවධාරණය කරයි. ඉදිරි දින කිහිපය තුළ පවතින තත්ත්වය අනුව ගුවන් ගමන් කාලසටහන්වල තවත් වෙනස්කම් සිදු කිරීමට ඉඩ ඇති බවට ද ඔවුන් අනතුරු අඟවා ඇත.
ඉරානය සහ ඊශ්රායලය අතර පවතින දරුණු යුදමය වාතාවරණය හේතුවෙන් ජාත්යන්තර ගුවන් සේවා ක්ෂේත්රයට දැඩි බලපෑම් එල්ල වී තිබේ. කලාපයේ ප්රධාන ගුවන් ගමන් මධ්යස්ථාන (Hubs) හරහා සිදුවන ගුවන් ගමන් රාශියක් අවලංගු කිරීමට හෝ ප්රමාද කිරීමට බොහෝ ගුවන් සමාගම්වලට සිදුව ඇත. මෙම තත්ත්වය හේතුවෙන් ගල්ෆ් කලාපයේ රැකියාවල නිරත ශ්රී ලාංකිකයන් ඇතුළු දහස් සංඛ්යාත මගීන් දැඩි අපහසුතාවයට පත්ව සිටින අතර, විකල්ප ගුවන් මාර්ග භාවිත කිරීම නිසා ගුවන් ගමන් කාලය සහ ටිකට්පත් මිල ද ඉහළ ගොස් තිබේ.
