ඉරානය සමඟ පවතින යුද්ධය “අතිමහත් සාර්ථකත්වයක්” ලබා ඇති බව ප්රකාශ කළ ඇමරිකානු ආරක්ෂක ලේකම් පීට් හෙග්සෙත් මහතා, ජනාධිපති ඩොනල්ඩ් ට්රම්ප් විවේචනය කරන මාධ්ය සහ ඇතැම් විදේශීය මිත්ර රටවල් දැඩි දෝෂදර්ශනයට ලක් කළේය. පෙන්ටගනයේ පැවති මාධ්ය හමුවකදී ඔහු කියා සිටියේ මාධ්යවේදීන් සහ යුරෝපයේ “කෘතගුණ නොදන්නා මිතුරන්” ට්රම්ප්ගේ පරාජය අපේක්ෂා කළද, ඇමරිකානු ජනතාව සැබෑ තත්ත්වය අවබෝධ කරගෙන සිටින බවයි. මුළු මහත් ලෝකයම ජනාධිපති ට්රම්ප්ට “ස්තූතියි” කිව යුතු බව ද ඔහු මෙහිදී අවධාරණය කළේය.
මෙම ප්රකාශය නිකුත් වන්නේ ලෝක වෙළඳපොළේ තෙල් මිල ශීඝ්රයෙන් ඉහළ යාම නිසා ඇමරිකානු මධ්යම බැංකුව (Federal Reserve) ඇතුළු මූල්ය ආයතන උද්ධමනය පිළිබඳව අනතුරු අඟවා ඇති පසුබිමක ය. යුද්ධය ආරම්භ වීමට පෙර පැවති ඉන්ධන මිල ගණන් සැළකිය යුතු ලෙස ඉහළ ගොස් ඇති අතර, බ්රෙන්ට් වර්ගයේ බොරතෙල් බැරලයක මිල ඩොලර් 114 සීමාව දක්වා ඉහළ ගොස් තිබේ. හෝමුස් සමුද්ර සන්ධිය හරහා සිදුවන තෙල් ප්රවාහනයට ඉරාන මිසයිල සහ බෝම්බ තර්ජන එල්ල වී තිබීම මෙම අර්බුදයට ප්රධාන හේතුව වී ඇත.
ඉරාන යුද්ධය යනු බුෂ්, ඔබාමා හෝ බයිඩන් වැනි “අඥාන දේශපාලනඥයන්” මෙහෙයවූ ඉරාක හෝ ඇෆ්ගනිස්ථාන යුද්ධ වැනි එකක් නොවන බව ද හෙග්සෙත් මහතා පැවසීය. මෙම යුද්ධයෙන් මේ වන විට ඇමරිකානු සෙබළුන් 13 දෙනෙකු ජීවිතක්ෂයට පත්ව 140 දෙනෙකු තුවාල ලබා ඇතත්, රජයේ අරමුණු ඉටු කර ගැනීම සඳහා පසුනොබසින බව ඔහු යළිත් තහවුරු කළේය. හිටපු ෆොක්ස් නිව්ස් නිවේදකයෙකු වූ හෙග්සෙත් මහතාගේ මෙම ප්රකාශය ඇමරිකානු දේශපාලන ක්ෂේත්රය තුළ දැඩි සංවාදයකට මග පාදා තිබේ.
