දකුණු සහ මධ්යම ආසියාව සඳහා වන ඇමෙරිකානු විශේෂ නියෝජිත මෙන්ම ඉන්දියාවේ එක්සත් ජනපද තානාපතිවරයා ලෙස කටයුතු කරන සර්ජියෝ ගෝර් (Sergio Gor) මහතා අද (19) පෙරවරුවේ ජනාධිපති කාර්යාලයේදී ජනාධිපති අනුර කුමාර දිසානායක මහතා හමුවිය. මාර්තු 19 සිට 24 දක්වා ශ්රී ලංකාවේ සහ මාලදිවයිනේ නිල සංචාරයක නිරත වන සර්ජියෝ ගෝර් මහතාගේ මෙම පැමිණීම සනිටුහන් වන්නේ, ඇමෙරිකානු පැසිෆික් බලඇණියේ අණදෙන නිලධාරී අද්මිරාල් ස්ටීව් කේලර්ගේ කොළඹ සංචාරයෙන් මසකට පසුවය. ඇමෙරිකාව සහ ඊශ්රායලය එක්ව ඉරානයට එරෙහිව ඒකාබද්ධ ප්රහාරයක් එල්ල කිරීමට දින කිහිපයකට පෙර පැසිෆික් අණදෙන නිලධාරියා මෙරටට පැමිණ සිටීම දේශපාලන වශයෙන් විශේෂ අවධානයට ලක්වූ කරුණකි.
මෙම හමුවේදී දෙරට අතර ද්විපාර්ශ්වික සබඳතා තවදුරටත් ශක්තිමත් කර ගැනීම පිළිබඳව දීර්ඝ ලෙස සාකච්ඡා වී ඇති අතර, වර්තමාන මැදපෙරදිග යුදමය තත්ත්වය සම්බන්ධයෙන් ශ්රී ලංකාවේ ස්ථාවරය සහ එමගින් මෙරටට එල්ල වී ඇති අභියෝග පිළිබඳව ජනාධිපතිවරයා ඇමෙරිකානු නියෝජිත පිරිස දැනුවත් කර තිබේ. ඉන්දියානු සාගර කලාපයේ සහයෝගීතාව වර්ධනය කිරීම සහ නිදහස්, විවෘත මෙන්ම සමෘද්ධිමත් ඉන්දු-පැසිෆික් කලාපයක් පවත්වාගෙන යාම සඳහා එක්සත් ජනපදය දරන උත්සාහයන්ට සහය වීම මෙම සංචාරයේ ප්රධාන අරමුණක් බව ඇමෙරිකානු රාජ්ය දෙපාර්තමේන්තුව සඳහන් කරයි.
විශේෂ නියෝජිත ගෝර්ගේ මෙම සංචාරය හරහා අත්යවශ්ය මුහුදු මාර්ග ආරක්ෂා කිරීම, වරායන් සුරක්ෂිත කිරීම සහ දෙරට අතර අන්යෝන්ය වශයෙන් වාසිදායක වෙළෙඳ සහ වාණිජ සබඳතා වර්ධනය කර ගැනීම කෙරෙහි අවධානය යොමු කෙරේ. ශ්රී ලංකාවේ ස්වෛරීභාවය සඳහා එක්සත් ජනපදයේ සහයෝගය නැවත තහවුරු කිරීමටත්, සමුද්රීය ආරක්ෂාවේ සිට උපාය මාර්ගික ආයෝජන දක්වා වූ පුළුල් ක්ෂේත්ර ගණනාවක සහයෝගීතාව ශක්තිමත් කිරීමටත් මෙහිදී අපේක්ෂා කෙරේ. සර්ජියෝ ගෝර් මහතා ඇමෙරිකානු ජනාධිපති ඩොනල්ඩ් ට්රම්ප් මහතාගේ සමීපතමයෙකු මෙන්ම මීට පෙර ධවල මන්දිරයේ ජනාධිපති සහයක නිලධාරියෙකු ලෙස ද කටයුතු කර ඇති අතිශය පළපුරුදු රාජ්ය තාන්ත්රිකයෙකි.
