ඊශ්රායලය සහ ඉරානය අතර පවතින දරුණු යුද ගැටුම් මධ්යයේ, ඊශ්රායල පාලනයේ පවතින බටහිර ඉවුරේ (West Bank) පදිංචි පලස්තීන වැසියන් සිවුදෙනෙකු ඉරාන මිසයිල කොටස් පතිත වීමෙන් අවාසනාවන්ත ලෙස මියගොස් තිබේ. කිසිදු පූර්ව අනතුරු ඇඟවීමකින් තොරව සිදුවූ මෙම පිපිරීම් හේතුවෙන් පලස්තීන වැසියන් දැඩි අසරණභාවයට පත්ව ඇති බව වාර්තා වේ.
පසුගිය බදාදා රාත්රී 9:30ට පමණ බටහිර ඉවුරේ ‘බීට් අවා’ (Beit Awa) නමැති පලස්තීන නගරයේ පිහිටි රූපලාවන්යාගාරයක් මතට මෙම මිසයිල කොටස් පතිත වී ඇත. එම අවස්ථාවේදී එහි සිටි කාන්තාවන් තිදෙනෙකු එම ස්ථානයේදීම ජීවිතක්ෂයට පත් වූ අතර, හය මසක ගැබිනියක වූ සිව්වන කාන්තාව රෝහල්ගත කිරීමෙන් පසු මියගොස් තිබේ. ඇසින් දුටුවන් පවසන්නේ කිසිදු සීරුවෙන් තැබීමේ සංඥාවක් (Alert) නිකුත් නොවූ බැවින් තමන්ට ආරක්ෂිත ස්ථාන කරා යාමට අවස්ථාවක් නොලැබුණු බවයි.
තමන්ට කිසිදු සම්බන්ධයක් නොමැති යුද්ධයකට මැදිව අහිංසක ජීවිත අහිමි වීම පිළිබඳව ප්රදේශවාසීන් දැඩි කනස්සල්ල පළ කරති. “මේක අපේ යුද්ධයක් නෙවෙයි” යනුවෙන් පවසන ඔවුන්, තමන් තවදුරටත් අනාරක්ෂිත වී ඇති බව පෙන්වා දෙති. මෙම ප්රහාරයෙන් වර්ග මීටර් 200ක පමණ ප්රදේශයකට දැඩි හානි සිදුව ඇති අතර, ප්රදේශය පුරා මිසයිල කැබලි විසිරී ඇති බව AFP පුවත් සේවය වාර්තා කරයි.
