කොළඹ නගරාධිපතිනී ව්රායි කැලි බැල්තසාර් (Vraie Cally Balthazaar) මහත්මිය ඕස්ට්රේලියානු විදේශ කටයුතු සහ වෙළඳ දෙපාර්තමේන්තුවේ (DFAT) විශේෂ අමුත්තන්ගේ වැඩසටහනක් යටතේ හෙට (21) සිට මාර්තු 30 වැනිදා දක්වා ඕස්ට්රේලියාවේ නිල සංචාරයක නිරත වීමට නියමිතය. මෙම සංචාරය අතරතුර ඇය මෙල්බර්න්, කැන්බරා සහ සිඩ්නි යන නගරවල රජයේ නියෝජිතයන්, පළාත් පාලන ආයතන සහ ප්රතිපත්ති සම්පාදක ආයතන සමඟ විශේෂ සාකච්ඡා කිහිපයකට සහභාගී වීමට නියමිත බව වාර්තා වේ.
නගරාධිපතිනිය සඳහන් කරන පරිදි, මෙම සංචාරයේ ප්රධාන අරමුණ වන්නේ නාගරික පාලනය, තිරසාර නගර සංවර්ධනය සහ ජාතික ඔරොත්තු දීමේ හැකියාව ශක්තිමත් කිරීමේදී පළාත් පාලන ආයතන සතු කාර්යභාරය පිළිබඳව අත්දැකීම් සහ දැනුම හුවමාරු කර ගැනීමයි. ඕස්ට්රේලියානු රජය විසින් කරන ලද මෙම ආරාධනය සහ සංචාරය සඳහා කර ඇති විධිවිධාන පිළිබඳව ඇය සිය කෘතඥතාව පළ කර ඇති අතර, මෙහිදී ලබන අත්දැකීම් කොළඹ නගරයේ පාලන කටයුතු සහ සංවර්ධන කටයුතු වඩාත් ශක්තිමත් කිරීමට දායක වනු ඇතැයි ඇය විශ්වාසය පළ කරයි.
විශේෂයෙන්ම මැදපෙරදිග අර්බුදය හමුවේ ලෝකයේ නගර මුහුණ දෙන ආර්ථික සහ බලශක්ති අභියෝග කළමනාකරණය කිරීමේදී ඕස්ට්රේලියාව වැනි රටවල් අනුගමනය කරන නව්ය ක්රමවේදයන් මෙරටට හඳුන්වා දීමට ද මෙම සංචාරය මනා පිටුවහලක් වනු ඇත. කොළඹ නගරය වඩාත් කාර්යක්ෂම සහ පරිසර හිතකාමී නගරයක් බවට පත් කිරීමේ රජයේ වැඩපිළිවෙළට ද මෙය සෘජු දායකත්වයක් ලබා දීමට නියමිතය.
