ඇමරිකානු ෆෙඩරල් ආයතනයක් වන එක්සත් ජනපද ලලිත කලා කොමිසම (Commission of Fine Arts), ඩොනල්ඩ් ට්රම්ප් මහතාගේ රුව සහිත සමරු රන් කාසියක් නිකුත් කිරීමේ සැලසුම් සඳහා ඒකමතිකව අනුමැතිය ලබා දී තිබේ. ට්රම්ප් මහතා විසින් පත් කරන ලද සාමාජිකයන්ගෙන් සමන්විත මෙම කොමිසම ඊයේ (19) මෙම තීරණය ගෙන ඇති අතර, ජීවතුන් අතර සිටින ජනාධිපතිවරයෙකුගේ රුව මුදල් ඒකකයකට යොදා ගැනීම පිළිබඳව මේ වන විට දැඩි නීතිමය තර්ක විතර්ක මතු වී ඇත.
සාමාන්යයෙන් ඇමරිකානු ෆෙඩරල් නීතියට අනුව සංසරණය වන මුදල් සඳහා ජීවතුන් අතර සිටින ජනාධිපතිවරුන්ගේ රුව යෙදීම තහනම් වුවද, මෙම කාසිය සංසරණය සඳහා නොව “සමරු අයිතමයක්” ලෙස නිකුත් කිරීමට නියමිත බැවින් එම නීතිය මඟහැර යාමට රජය උත්සාහ කරන බව වාර්තා වේ. මෙම රන් කාසියේ එක් පසෙක ‘බෝල්ඩ් ඊගල්’ (Bald Eagle) පක්ෂියාගේ රුව ද, අනෙක් පස මේසයකට බර වී ඉදිරිය බලා සිටින ට්රම්ප් මහතාගේ ප්රබල රුවක් ද ඇතුළත් කිරීමට නියමිතය. මෙය ජාතික ආලේඛ්ය ගැලරියේ (National Portrait Gallery) තබා ඇති ඡායාරූප ශිල්පී ඩැනියෙල් ටොරොක්ගේ කළු සුදු ඡායාරූපයක් ඇසුරින් නිර්මාණය වන්නකි.
කොමිසමේ සාමාජික චේම්බර්ලයින් හැරිස් පවසන්නේ මෙම රන් කාසිය අඟල් 3ක් (සෙන්ටිමීටර 7.6ක්) පමණ විශාලත්වයකින් යුක්ත වනු ඇති බවයි. රන් කාසියට අමතරව ඩොලර් 1 කාසියකට ද ට්රම්ප්ගේ රුව එක් කිරීමට සහ කෙනඩි මධ්යස්ථානය වැනි ආයතනවලට ඔහුගේ නම යෙදීමට ගෙන ඇති උත්සාහයන්ට එරෙහිව මේ වන විට අධිකරණයේ නඩු පවරා තිබේ. විචාරකයින් පවසන්නේ බලයේ සිටින නායකයෙකු මෙවැනි පියවර ගැනීම නුසුදුසු මෙන්ම නීති විරෝධී ක්රියාවක් බවයි.
