කැලිෆෝනියා ප්රාන්තයේ සැලිඩා හි පදිංචි යුවළක්, තම 11 හැවිරිදි ලේලියට වසරකට ආසන්න කාලයක් තිස්සේ අතිශය අමානුෂික ලෙස වධහිංසා පැමිණවීමේ චෝදනාව මත අත්අඩංගුවට ගෙන තිබේ. ස්ටැනිස්ලවුස් කවුන්ටි ෂෙරිෆ් කාර්යාලය පවසන පරිදි, 37 හැවිරිදි ප්රිසිලා මෙස්ටාස් සහ ඇයගේ සහකරු වන 36 හැවිරිදි ඇන්තනි මචූකා විසින් මෙම කුඩා දැරියට වසරක පමණ කාලයක් තිස්සේ ශාරීරික හා මානසික වධහිංසා පමුණුවා ඇත. දැරියගේ ගෙල සිර කිරීම, පහර දීම සහ බල්ලන් බඳින ලණුවකින් ඇදගෙන යාම වැනි දරුණු ක්රියාවලට මොවුන් සම්බන්ධ වී ඇති බව විමර්ශනවලදී හෙළි විය.
මෙම අපරාධය අනාවරණය වී ඇත්තේ පසුගිය ජනවාරි 31 වනදා අදාළ දැරිය නැවත නිවසට යාම ප්රතික්ෂේප කරමින් තමන්ට සිදුවන වධහිංසා පිළිබඳව පොලිසියට පැවසීමත් සමඟයි. නිවසේ තිබූ ආරක්ෂිත කැමරා දර්ශන පරීක්ෂා කිරීමේදී දැරිය පැවසූ සියලු තොරතුරු සත්ය බව තහවුරු වී තිබේ. දැරිය පදිංචි කරවා තිබුණේ කිසිදු පහසුකමක් නොමැති ගරාජයක සහ ගෙවත්ත තුළ බවත්, ඇයට නිසි ආහාර පාන ලබා නොදී දැඩි ලෙස මන්දපෝෂණයට ලක් කර තිබූ බවත් පොලිසිය පවසයි.
විශේෂයෙන්ම, ප්රධාන සැකකාරිය වන ප්රිසිලා මෙස්ටාස් මීට පෙර ළමා හා පවුල් සේවා ආයතනයක කළමනාකාරිනියක ලෙස කටයුතු කර ඇති බව හෙළි වී තිබේ. අනාරක්ෂිත දරුවන් ආරක්ෂා කිරීමේ වගකීමක් පැවති තැනැත්තියක මෙවැනි අපරාධයකට සම්බන්ධ වීම කම්පනයට කරුණකි. මචූකා වහාම අත්අඩංගුවට ගත් නමුත්, මෙස්ටාස් ඒ වන විට ගැබිනියකව සිටි බැවින් ඇයව අත්අඩංගුවට ගෙන ඇත්තේ දරු ප්රසූතියෙන් පසු මාර්තු 12 වනදාය. මොවුන් දෙදෙනාට එරෙහිව වධහිංසා පැමිණවීම, කුමන්ත්රණය කිරීම, ළමා අනාරක්ෂිතභාවය සහ මාරාන්තික ආයුධයකින් පහර දීම ඇතුළු අධි චෝදනා 27ක් ගොනු කර ඇත. දැනට මෙම යුවළ ඩොලර් මිලියනයක ඇප මත රක්ෂිත බන්ධනාගාරගත කර සිටින අතර, පීඩාවට පත් දැරිය සහ නිවසේ සිටි අනෙකුත් දරුවන් ළමා ආරක්ෂක ඒකකයේ භාරයට ගෙන තිබේ.
