රාජ්ය අංශයේ සයිබර් ආරක්ෂණ දැනුම ඉහළ නැංවීමේ අරමුණින් ශ්රී ලංකා සර්ට් (Sri Lanka CERT) ආයතනය විසින් පාර්ලිමේන්තු කාර්ය මණ්ඩලය වෙනුවෙන් විශේෂ පුහුණු වැඩසටහනක් පසුගියදා පවත්වා තිබේ. රාජ්ය නිලධාරීන්ගේ ඩිජිටල් ආරක්ෂණ ධාරිතාව වර්ධනය කරන ලෙස ජනාධිපති අනුර කුමාර දිසානායක මහතා ඩිජිටල් ආර්ථික අමාත්යාංශයට සහ ශ්රී ලංකා සර්ට් ආයතනයට ලබා දුන් උපදෙස් මත මෙම වැඩසටහන සංවිධානය කර ඇත.
පාර්ලිමේන්තු මහලේකම් කුශාණි රෝහනධීර මහත්මිය ඇතුළු සියලුම දෙපාර්තමේන්තු ප්රධානීන් සහ ජ්යෙෂ්ඨ නිලධාරීන් මීට සහභාගී වී තිබේ. ශ්රී ලංකා සර්ට් ආයතනයේ ප්රධාන තොරතුරු ආරක්ෂණ නිලධාරී නිරෝෂ් අනන්ද, ප්රධාන තොරතුරු ආරක්ෂණ ඉංජිනේරු චරුක දමුනුපොල සහ ව්යාපෘති කළමනාකරු තිලින දිසානායක යන මහත්වරුන් විසින් මෙම පුහුණු සැසි මෙහෙයවනු ලැබීය.
මෙහිදී සමාජ මාධ්ය වගකීමෙන් සහ නෛතික රාමුවක් තුළ භාවිතා කිරීම, අන්තර්ජාල ආරක්ෂාව සහ සයිබර් ආරක්ෂාව තහවුරු කරගන්නා ආකාරය පිළිබඳව නිලධාරීන් දැනුවත් කර ඇත. එමෙන්ම සමාජ මාධ්ය තුළ ඇතිවන අර්බුද කළමනාකරණය සහ ඩිජිටල් මාධ්ය ක්ෂේත්රයේ නවතම ප්රවණතා පිළිබඳව ද මෙහිදී දීර්ඝ වශයෙන් සාකච්ඡා වී තිබේ.
රාජ්ය ආයතනවල තොරතුරු පද්ධතිවල ආරක්ෂාව තහවුරු කිරීම සහ රාජ්ය රහස්යභාවය රැක ගැනීම සඳහා මෙවැනි පුහුණු වැඩසටහන් අතිශය වැදගත් වන බව ශ්රී ලංකා සර්ට් ආයතනය පෙන්වා දෙයි. විශේෂයෙන්ම ගෝලීය වශයෙන් සයිබර් ප්රහාර ඉහළ යමින් පවතින වටපිටාවක ශ්රී ලංකාවේ ප්රධානතම ආයතනයක නිලධාරීන් මෙලෙස සන්නද්ධ කිරීම කාලීන අවශ්යතාවකි.
