පසුගියදා බලපෑ ‘දිට්වා’ සුළි කුණාටුව හේතුවෙන් අර්ධ වශයෙන් නිවාස හානි වූ කොලොන්නාව ප්රාදේශීය ලේකම් කොට්ඨාසයේ පවුල් 1,253ක් වෙනුවෙන් හානිපූර්ණ වන්දි චෙක්පත් පිරිනැමීම අද (20) දින නාගරික සංවර්ධන නියෝජ්ය අමාත්ය එරංග ගුණසේකර මහතාගේ ප්රධානත්වයෙන් ආරම්භ විය. පළමු අදියර යටතේ ග්රාම සේවා වසම් 17ක ජනතාව වෙනුවෙන් මෙම වන්දි ලබාදීම සිදුකෙරෙන අතර, ගොතටුව ශ්රී කන්දෙ විහාරස්ථානය සහ මුල්ලේරියාව ශ්රී කලටුවාවත්ත පුරාණ විහාරස්ථානය කේන්ද්ර කරගනිමින් මෙම වැඩසටහන ක්රියාත්මක කෙරිණි.
අර්ධ හානි වූ නිවාස සඳහා රජය මගින් අනුමත කර ඇති රුපියල් ලක්ෂ 05ක මුළු වන්දි මුදලින්, පළමු ඉදිකිරීම් වාරිකය ලෙස රුපියල් ලක්ෂ 03ක වටිනාකමින් යුත් චෙක්පත් අද දින නිවාස හිමියන් වෙත පිරිනමන ලදී. ඉතිරි රුපියල් ලක්ෂ 02ක මුදල නිවසේ ඉදිකිරීම් ප්රගතිය නිරීක්ෂණය කිරීමෙන් අනතුරුව ගිවිසුම්ගත එකඟතාවය මත ලබාදීමට නියමිතය. මෙම නිවාස වැඩසටහන යටතේ පෙර තිබූ නිවසට වඩා ප්රමිතිගත සහ ආරක්ෂිත නිවසක් ඉදිකිරීම සඳහා ප්රාදේශීය ලේකම් කාර්යාලයේ නිලධාරීන්ගේ සහ පළාත් පාලන ආයතන නියෝජිතයින්ගේ තාක්ෂණික සහ උපදේශන සහාය නිරන්තරයෙන් ලබාදීම සුවිශේෂී කරුණකි.
වන්දි ප්රදාන උත්සවය අමතමින් නියෝජ්ය අමාත්ය එරංග ගුණසේකර මහතා සඳහන් කළේ, කොළඹ දිස්ත්රික්කයේ දිට්වා ව්යසනයෙන් වැඩිම පවුල් සංඛ්යාවක් හානියට පත් වූයේ කොලොන්නාව ආසනයේ බවයි. එබැවින් මෙම අර්බුදය කළමනාකරණය කිරීම විශාල අභියෝගයක් වුවද, රාජ්ය නිලධාරීන්ගේ සහ දේශපාලන අධිකාරියේ සාමූහික මැදිහත්වීම මත ඉතා කෙටි කලක් තුළ ජනතාවට සහන සැලසීමට හැකි වූ බව ඔහු පැවසීය. විපක්ෂය විසින් එල්ල කරන පදනම් විරහිත චෝදනාවලට ප්රායෝගිකව පිළිතුරු දෙමින් ජනතාවගේ සුබසාධනය වෙනුවෙන් රජය කැපවී සිටින බවත්, පවතින බලශක්ති අර්බුදය හමුවේ ද ජනතාව බුද්ධිමත්ව සහ සාමූහිකව රට ගොඩනැගීමට එක්වනු ඇතැයි තමන් විශ්වාස කරන බවත් අමාත්යවරයා වැඩිදුරටත් අවධාරණය කළේය.
මෙම අවස්ථාවට කොලොන්නාව නගරාධිපති ධම්මික විජේමුණි, කොළඹ දිස්ත්රික් ලේකම් ගිනිගේ ප්රසන්න ජනක කුමාර සහ කොලොන්නාව ප්රාදේශීය ලේකම් ප්රියනාත් පෙරේරා ඇතුළු රාජ්ය නිලධාරීන් සහ ප්රාදේශීය දේශපාලන නියෝජිතයන් රැසක් සහභාගී වී සිටියහ.
