පවතින දැඩි ඉන්ධන අර්බුදය හමුවේ වෛද්යවරුන් ඇතුළු සෞඛ්ය කාර්ය මණ්ඩලයට සේවයට වාර්තා කිරීමට නොහැකි වීම හේතුවෙන් ලබන සඳුදා (23) සිට මෙරට රෝහල් පද්ධතිය සම්පූර්ණයෙන්ම අකර්මන්ය වීමේ බරපතල අවදානමක් මතුව ඇති බව රජයේ වෛද්ය නිලධාරීන්ගේ සංගමය (GMOA) නිවේදනය කරයි. වෛද්යවරුන්ගේ ප්රවාහන සහ ඉන්ධන ගැටලුවලට එළඹෙන පැය 48 ඇතුළත සාධනීය විසඳුමක් ලබා නොදුනහොත් සෞඛ්ය සේවාවන් අඩාල වීම වැළැක්විය නොහැකි බව එම සංගමය අවධාරණය කර සිටී.
සෞඛ්ය සේවාව අත්යවශ්ය සේවාවක් ලෙස ප්රකාශයට පත් කර තිබියදීත්, සේවකයන්ට රාජකාරියට පැමිණීමට අවශ්ය පහසුකම් සැලසීමට රජය අපොහොසත් වීම ජනතාවගේ ජීවිත අවදානමට ලක් කිරීමක් බව එම සංගමය පෙන්වා දෙයි. දැනට පවතින QR ක්රමවේදය යටතේ ලැබෙන ඉන්ධන කෝටාව රෝහල් සේවයට පැමිණීමට කිසිසේත්ම ප්රමාණවත් නොවන බවත්, රෝගී සත්කාරක සේවා සඳහා වෙන් කළ යුතු වටිනා කාලය පෝලිම්වල ගත කිරීමට සිදුවීම අවාසනාවන්ත තත්ත්වයක් බවත් එම නිවේදනයේ සඳහන් වේ.
මේ සම්බන්ධයෙන් ජනාධිපතිවරයා වෙත ලිඛිතව දන්වා දින 6ක් ගත වී ඇතත් මෙතෙක් කිසිදු ප්රතිචාරයක් ලැබී නොමැති බව පවසන GMOA සංගමය, ඉදිරි පැය 48 තුළ රජය නිසි පියවරක් නොගතහොත් සිදුවන ඕනෑම බිඳ වැටීමක වගකීම රජය සහ සෞඛ්ය අමාත්යවරයා භාරගත යුතු බවට අනතුරු අඟවයි. වෛද්යවරුන් ඇතුළු සෞඛ්ය සේවකයින් ප්රමුඛතා පදනම මත සලකා ඔවුන්ගේ ඉන්ධන ගැටලුව වහාම විසඳන ලෙස එම සංගමය රජයෙන් ඉල්ලා සිටී.
