මඩකලපුව කාත්තන්කුඩි පොලිස් වසමට අයත් ප්රධාන මාර්ගයේදී යාචක කණ්ඩායම් දෙකක් අතර පසුගිය (19) දා සවස ඇති වූ දරුණු ගැටුමකින් පුද්ගලයන් දෙදෙනෙකු බරපතළ තුවාල ලබා රෝහල් ගත කර තිබේ. ශුද්ධ වූ රාමසාන් උපවාස සමය නිමිත්තෙන් කාත්තන්කුඩි ප්රදේශයට විශාල පිරිසක් පැමිණීමත් සමඟ පිට පළාත්වලින් පැමිණි යාචකයන් පිරිසක් අතර මෙම ගැටුම හටගෙන ඇති බව පොලිසිය පවසයි.
රාත්රී කාලයේ වෙළඳසැල් ඉදිරිපිට ලැගුම් ගැනීම සම්බන්ධයෙන් ඇති වූ ආරවුලක් මෙම ගැටුමට මුල් වී ඇති අතර සිද්ධිය වන අවස්ථාවේ මොවුන් බීමතින් සිට ඇති බවට ද තොරතුරු අනාවරණය වී තිබේ. තුවාල ලැබූ පුද්ගලයන් දෙදෙනා පොලිස් සහාය ඇතිව ගිලන් රථයකින් මඩකලපුව ශික්ෂණ රෝහල වෙත ඇතුළත් කර ඇති අතර කාත්තන්කුඩි පොලිසිය මේ පිළිබඳව වැඩිදුර විමර්ශන පවත්වයි. උත්සව සමයේ නගරයේ ආරක්ෂාව සහ මහජන පීඩාවන් අවම කිරීම සඳහා පොලිස් මුර සංචාර දැඩි කිරීමට ද පියවර ගෙන ඇත.
