මැදපෙරදිග පවතින යුදමය වාතාවරණය හේතුවෙන් ඉන්ධන මිල ඉහළ යාම සහ සැපයුම අස්ථාවර වීමත් සමඟ පිලිපීන මෝටර් රථ වෙළෙඳපොළේ කැපී පෙනෙන වෙනසක් සිදුවෙමින් පවතින බව වාර්තා වේ. පසුගිය පෙබරවාරි මාසයේ දත්තවලට අනුව, සාම්ප්‍රදායික ඉන්ධන වාහන අලෙවිය 8% කින් පහත වැටී ඇති අතර, ප්ලග්-ඉන් හයිබ්‍රිඩ් (Plug-in Hybrid) වාහන අලෙවිය සියයට 600ක දැවැන්ත වර්ධනයක් පෙන්නුම් කර තිබේ. එසේම පූර්ණ විදුලි වාහන (Battery EV) අලෙවිය ද සියයට 80කින් ඉහළ ගොස් ඇත.
පිලිපීනය තුළ මෙම හදිසි වෙනසට ප්‍රධාන වශයෙන්ම බලපා ඇත්තේ අස්ථාවර ඉන්ධන මිල සහ රජය විසින් ලබා දෙන බදු සහනයි. 2022 දී හඳුන්වා දුන් විදුලි වාහන කර්මාන්ත සංවර්ධන පනත (EVIDA) යටතේ විදුලි වාහන සඳහා ආනයන බදු නිදහස් කිරීම් සහ ලියාපදිංචි කිරීමේදී ප්‍රමුඛතාව ලබා දීම වැනි දිරිගැන්වීම් රැසක් ක්‍රියාත්මක වේ. ටෙස්ලා (Tesla) සහ චීන නිෂ්පාදනයක් වන BYD වැනි වාහන සඳහා මේ වන විට පිලිපීනය තුළ විශාල ඉල්ලුමක් නිර්මාණය වී ඇති අතර ඇතැම් වාහන ලබා ගැනීම සඳහා මාස දෙකකට අධික පොරොත්තු ලේඛන පවතින බව ද සඳහන් වේ.
ගෝලීය වශයෙන් පවතින බලශක්ති අර්බුදය හමුවේ වියදම් අවම කර ගැනීම සඳහා පිලිපීන වැසියන් පෙළඹී ඇති අතර, මෙය දකුණු ආසියාතික කලාපයේ සෙසු රටවලට ද පොදු ප්‍රවණතාවක් බවට පත්වෙමින් තිබේ. විශේෂයෙන්ම වියට්නාමය, සිංගප්පූරුව සහ තායිලන්තය වැනි රටවල් ද වේගයෙන් විදුලි වාහන භාවිතය කරා යොමු වෙමින් පවතී. පිලිපීනයේ නගර ආශ්‍රිතව විදුලි වාහන ආරෝපණ මධ්‍යස්ථාන (Charging Stations) ස්ථාපිත කිරීමේ කටයුතු ද මේ වන විට වේගවත් කර ඇති අතර, ඉදිරි වසර කිහිපය තුළ එරට මෝටර් රථ ක්ෂේත්‍රයේ සම්පූර්ණ විප්ලවයක් සිදුවනු ඇතැයි ආර්ථික විශ්ලේෂකයෝ පුරෝකථනය කරති.
