ජනාධිපති අනුර කුමාර දිසානායක මහතා සහ පාර්ලිමේන්තුව නියෝජනය කරන පක්ෂ නායකයින් අතර විශේෂ සාකච්ඡාවක් ඊයේ (20) පස්වරුවේ පාර්ලිමේන්තු සංකීර්ණයේදී පැවැත්විණි. මෙම හමුවේදී ප්රධාන වශයෙන්ම අවධානය යොමු වී ඇත්තේ මැදපෙරදිග කලාපයේ වර්ධනය වෙමින් පවතින දරුණු යුදමය වාතාවරණය හේතුවෙන් ශ්රී ලංකාවට එල්ල විය හැකි බලශක්ති සහ ආර්ථික බලපෑම් පිළිබඳවයි. ගෝලීය වශයෙන් මතුව ඇති මෙම බලශක්ති අර්බුදය හමුවේ මෙරට ඉන්ධන සහ විදුලි සැපයුම අඛණ්ඩව පවත්වාගෙන යාම සඳහා රජය ගෙන ඇති හදිසි ක්රියාමාර්ග පිළිබඳව ජනාධිපතිවරයා මෙහිදී පක්ෂ නායකයින් දැනුවත් කරන ලදී.
විපක්ෂ නායක සජිත් ප්රේමදාස, රාවුෆ් හකීම් සහ මනෝ ගනේෂන් යන මහත්වරුන් ඇතුළු පක්ෂ නායකයින් රැසක් සහභාගී වූ මෙම සාකච්ඡාවේදී, ජාතික ආරක්ෂාව සහ මහජන පීඩාව අවම කිරීම සඳහා සියලු දේශපාලන පක්ෂ එක්ව කටයුතු කිරීමේ වැදගත්කම අවධාරණය කෙරිණි. විශේෂයෙන්ම ඉන්ධන මිල ඉහළ යාම සහ සැපයුම් දාමයන් අඩාල වීම හමුවේ අත්යවශ්ය භාණ්ඩ මිල පාලනය කිරීම සඳහා ගත යුතු ක්රියාමාර්ග පිළිබඳව ද මෙහිදී අදහස් හුවමාරු විය. මැදපෙරදිග වෙසෙන ශ්රී ලාංකිකයන්ගේ ආරක්ෂාව තහවුරු කිරීමටත්, දියේගෝ ගාසියා දූපතට එල්ල වූ ප්රහාරය වැනි සිදුවීම් හරහා ඉන්දීය සාගරයේ උද්ගතව ඇති ආරක්ෂක අවදානම කළමනාකරණය කිරීමටත් රජය උපරිමයෙන් කැපවන බව ජනාධිපතිවරයා මෙහිදී සහතික විය.
