ඇමරිකා එක්සත් ජනපදයේ ටෙක්සාස් ප්රාන්තයේ පෝට් ආතර්හි පිහිටි වැලෙරෝ බලශක්ති පිරිපහදුවක (Valero Energy refinery) පසුගිය සඳුදා සිදුවූ පිපිරීමත් සමඟ, ඉරාන විප්ලවීය ආරක්ෂක බලකාය (IRGC) සිය යුද උපායමාර්ගයන්හි සිදුකර ඇති බව කියන වෙනස්කම් පිළිබඳව දැඩි කතාබහක් නිර්මාණය වී තිබේ. මෙම ගින්න කාර්මික හීටරයක දෝෂයක් හේතුවෙන් හටගත් බවට පෝට් ආතර් පොලිස් දෙපාර්තමේන්තුවේ ෂෙරිෆ් සේනා ස්ටීවන්ස් ප්රකාශ කර තිබුණද, මෙම සිදුවීම පිටුපස විදේශීය බලපෑමක් ඇති බවට විවිධ පාර්ශව සැක පළ කරමින් සිටිති.
ලෙබනනයේ අල් මායඩීන් (Al Mayadeen) පුවත් සේවය වාර්තා කර ඇති පරිදි, ඉරාන විප්ලවීය ආරක්ෂක බලකාය ඇමරිකාව සහ ඊශ්රායලය සම්බන්ධයෙන් මෙතෙක් අනුගමනය කළ ‘ආරක්ෂාකාරී’ උපායමාර්ගය අතහැර ‘පහරදීමේ’ උපායමාර්ගයකට අවතීර්ණ වී ඇත. මෙම පසුබිම මත, වැලෙරෝ පිරිපහදුවේ පිපිරීම ඉරානයට සම්බන්ධ සමාජ මාධ්ය ගිණුම් හරහා ‘කඩාකප්පල්කාරී ක්රියාවක්’ ලෙස හඳුන්වා දීමත් සමඟ මෙම ප්රහාරය සහ ඉරාන බලකායේ නව උපායමාර්ගය අතර සම්බන්ධයක් ඇති බවට දැඩි සමපේක්ෂනයක් නිර්මාණය වී තිබේ.
කෙසේ වෙතත්, බලධාරීන් මේ වන විටත් මෙම සිදුවීම කාර්මික අනතුරක් ලෙස සලකා විමර්ශන පවත්වන බව වාර්තා වේ. ෂෙරිෆ්වරිය පවසන පරිදි මෙය හීටරයක් නිසා ඇති වූවක් බවට සැක කළ ද, සමාජ මාධ්ය හරහා පැතිර යන මතවාද හමුවේ ආරක්ෂක අංශ මේ පිළිබඳව දැඩි අවධානයෙන් පසුවේ. මැදපෙරදිග කලාපයේ පවතින උණුසුම් වාතාවරණය හමුවේ ඇමරිකානු බලශක්ති මධ්යස්ථාන ඉලක්ක කර ගනිමින් මෙවැනි සිදුවීම් වාර්තා වීම ජාත්යන්තර දේශපාලන ක්ෂේත්රයේ ද කතාබහට ලක්ව ඇති කරුණකි.
