මැදපෙරදිග කලාපයේ ප්රධානතම ද්රවීකෘත ස්වාභාවික වායු (LNG) නිෂ්පාදන මධ්යස්ථානයක් වන කටාර් රාජ්යයේ රාස් ලෆාන් (Ras Laffan) සංකීර්ණය වෙත එල්ල වූ මිසයිල ප්රහාර හේතුවෙන් “Force Majeure” (අපේක්ෂා නොකළ පාලනය කළ නොහැකි තත්ත්වයක්) ප්රකාශයට පත් කිරීමට කටාර් බලශක්ති ආයතනය පියවර ගෙන තිබේ. පසුගිය බදාදා සහ බ්රහස්පතින්දා දිනවල එල්ල වූ මෙම ප්රහාරවලින් LNG නිෂ්පාදන ඒකක දෙකක් සහ ගෑස්-ටු-ලික්විඩ්ස් (GTL) ඒකකයක් වෙත දැඩි හානි සිදු වී ඇති බව වාර්තා වේ.
මෙම හදිසි තත්ත්වය හේතුවෙන් ඉතාලිය, බෙල්ජියම, දකුණු කොරියාව සහ චීනය වැනි රටවල් කිහිපයකට සිදු කරන LNG සැපයුම් තාවකාලිකව නතර කර ඇත. කටාර් බලශක්ති ආයතනය දැනට සිදුව ඇති සම්පූර්ණ හානිය තක්සේරු කරමින් සිටින අතර, අලුත්වැඩියා කටයුතු නිම කර නැවත සැපයුම් ආරම්භ කිරීමට ගතවන කාලය පිළිබඳව මෙතෙක් නිශ්චිත ප්රකාශයක් සිදු කර නොමැත.
“Force Majeure” ප්රකාශය මඟින් සමාගමකට තම පාලනයෙන් බැහැර වූ යුද්ධ හෝ ස්වභාවික විපත් වැනි තත්ත්වයන් හමුවේ ගිවිසුම්ගත වගකීම් ඉටු කිරීමට නොහැකි වීම සම්බන්ධයෙන් නීතිමය සහනයක් හිමි වේ. ලොව විශාලතම LNG අපනයනකරුවෙකු වන කටාර් රාජ්යයේ මෙම සැපයුම් අඩාල වීම ගෝලීය බලශක්ති වෙළඳපොළේ මිල ගණන් ඉහළ යාමට සහ බලශක්ති අනාරක්ෂිත භාවයක් ඇති කිරීමට සෘජුවම බලපානු ඇති බව ආර්ථික විශ්ලේෂකයෝ පෙන්වා දෙති.
