මෙවර යල කන්නය සඳහා අවශ්ය පොහොර ලබාදීම ගොවිජන සංවර්ධන දෙපාර්තමේන්තුව යටතේ පවතින ගොවිජන මධ්යස්ථාන මඟින් පමණක් සිදු කිරීමට රජය තීරණය කර ඇති බව ගොවිජන සංවර්ධන කොමසාරිස් ජනරාල් ධම්මික රණතුංග මහතා පවසයි. වර්තමානයේ පවතින මැදපෙරදිග යුදමය වාතාවරණය හමුවේ ඉදිරියේදී පොහොර මිල ඉහළ යනු ඇතැයි යන උපකල්පනය මත ඇතැම් පාර්ශ්වයන් පොහොර තොග රැස් කිරීමට උත්සාහ කිරීම වැළැක්වීම සඳහා මෙම පියවර ගෙන තිබේ. ඒ අනුව වී වගාවට අවශ්ය සියලුම පොහොර වර්ග ගොවිජන මධ්යස්ථාන හරහා සෘජුවම ගොවීන් වෙත නිකුත් කිරීමට කටයුතු යොදා ඇත.
දිවයින පුරා විහිදී ඇති ගොවිජන මධ්යස්ථාන 566 හරහා දැනටමත් ප්රධාන වී වගා කරන ප්රදේශවල ගොවීන් වෙත පොහොර නිකුත් කිරීම ආරම්භ කර තිබේ. කෘෂිකර්ම දෙපාර්තමේන්තුව විසින් නිර්දේශ කරන ලද පොහොර ප්රමාණයන් පමණක් ගොවීන් වෙත ලබාදෙන අතර, සෑම මධ්යස්ථානයක් සතුවම ප්රදේශයේ ගොවීන්ගේ නාමලේඛන සහ ඔවුන් වගා කරන භූමි ප්රමාණයන් පිළිබඳ දත්ත පවතින බැවින් වංචා සහගත ලෙස පොහොර ලබා ගැනීම මෙහිදී වළක්වා ගත හැකිය. එක් එක් ගොවියා වගා කරන කුඹුරු ප්රමාණයට සරිලන පරිදි නිසි පොහොර ප්රමාණය ලබා දීමට නිලධාරීන් කටයුතු කරනු ඇත.
යල කන්නයට අවශ්ය පොහොර ප්රමාණය පිළිබඳව කිසිදු සැකයක් හෝ බියක් ඇති කර ගත යුතු නැති බව ජාතික පොහොර ලේකම් කාර්යාලය සහතික කර ඇතැයි කොමසාරිස් ජනරාල්වරයා අවධාරණය කළේය. එබැවින් වෙළඳපොළේ පොහොර හිඟයක් ඇති වේ යැයි අනවශ්ය බියක් ඇති කර නොගෙන, තමන්ට අවශ්ය පොහොර ප්රමාණය පමණක් ගොවිජන සේවා මධ්යස්ථාන මඟින් ලබා ගන්නා ලෙස ඔහු සියලුම ගොවීන්ගෙන් ඉල්ලා සිටියි. මෙම විධිමත් ක්රමවේදය හරහා පොහොර මාෆියාව පාලනය කරමින් සැබෑ ගොවියාට සාධාරණ මිලට පොහොර ලබා දීම රජයේ මූලික අරමුණයි.
