ඉන්දියාවේ හර්යානා ප්රාන්තයේ ගුරුග්රාම් (Gurugram) ප්රදේශයේ තුන් හැවිරිදි දැරියක අපයෝජනයට ලක්වීමේ සිද්ධියකදී විමර්ශන සිදු කළ පොලිස් නිලධාරීන්ගේ ක්රියාකලාපය ඉන්දීය ශ්රේෂ්ඨාධිකරණය අද (2026 මාර්තු 25) දැඩි දෝෂදර්ශනයට ලක් කළේය. අදාළ විමර්ශන මෙහෙයවූ නිලධාරීන්ගේ ශාස්ත්රීය හා වෘත්තීය සුදුසුකම් පිළිබඳව තමන්ට සැකයක් පවතින බව ප්රකාශ කළ අධිකරණය, සැකකරුවන් ආරක්ෂා කිරීම සඳහා පොලිසිය “සර්වප්රකාරයෙන්ම” උත්සාහ කර ඇති බවට චෝදනා කළේය.
සෙක්ටර් 54 ප්රදේශයේ නිවාස සංකීර්ණයකදී වසර දෙකක පමණ කාලයක් පුරා මෙම දැරිය ලිංගික අතවරයට ලක්ව ඇති බවට තොරතුරු අනාවරණය වී තිබුණි. මෙම නඩුව විභාගයට ගත් අවස්ථාවේදී හෙළි වූයේ වින්දිත දැරියගේ ප්රකාශය මහේස්ත්රාත්වරයා විසින් වාර්තා කර ඇත්තේ ද සැකකරුවන් ඉදිරිපිටදීම බවයි. මෙය ඉතා බරපතල තත්ත්වයක් බව පෙන්වා දුන් ශ්රේෂ්ඨාධිකරණය, පොලිසිය විසින් ඉදිරිපත් කර ඇති වාර්තාව ද පදනම් විරහිත එකක් බව අවධාරණය කළේය.
විමර්ශනවල පවතින මෙම බරපතල අඩුපාඩු සැලකිල්ලට ගනිමින් වහාම ක්රියාත්මක වන පරිදි විශේෂ විමර්ශන කණ්ඩායමක් (SIT) පත් කරන ලෙස හර්යානා රජයට නියෝග කෙරුණි. එසේම හෙට (මාර්තු 26) දිනට පෙර මෙම නඩුවට අදාළ සියලු වාර්තා භාර දෙන ලෙස ද ගුරුග්රාම් පොලිසියට නියෝග කර තිබේ. මෙම සිද්ධිය සම්බන්ධයෙන් අදාළ පොලිස් නිලධාරීන්ට එරෙහිව විනය ක්රියාමාර්ග නොගත යුත්තේ මන්දැයි යන්න පිළිබඳව ද අධිකරණය ප්රශ්න කර සිටියේය.
