වලංගු වීසා බලපත්ර සහිත ඉරාන ජාතික සංචාරකයින්ට ඔස්ට්රේලියාවට ඇතුළු වීම වහාම ක්රියාත්මක වන පරිදි ඉදිරි මාස හයක කාලය සඳහා තහනම් කිරීමට ඔස්ට්රේලියානු රජය තීරණය කර තිබේ. එරට ස්වදේශ කටයුතු අමාත්ය ටෝනි බර්ක් (Tony Burke) විසින් ඊයේ (2026 මාර්තු 25) මෙම නිවේදනය නිකුත් කරන ලද අතර, අද (මාර්තු 26) සිට මෙම තහනම බලාත්මක වේ.
මෙම තීරණයට ප්රධානතම හේතුව වී ඇත්තේ ඉරාන යුද්ධය හේතුවෙන් සංචාරක වීසා මත පැමිණෙන පුද්ගලයින් නැවත සිය රට බලා නොයාමට ඇති හැකියාව පිළිබඳව මතු වී ඇති සැකයයි. ඔස්ට්රේලියානු රජය පවසන්නේ ස්ථිර පදිංචිය ලබා දීම රජයේ සැලසුම් සහගත තීරණයක් විය යුතු අතර, එය හුදෙක් නිවාඩුවක් සඳහා පැමිණි අයෙකුට හිමිවන අහඹු අවස්ථාවක් නොවිය යුතු බවයි. මෙම තහනම හේතුවෙන් වීසා බලපත්ර හිමි ඉරාන ජාතිකයින් 6,800කට පමණ සිය සංචාරක අවස්ථා අහිමි වනු ඇත. කෙසේ වෙතත්, ඔස්ට්රේලියානු පුරවැසියන්ගේ සහකරුවන්ට සහ දරුවන්ට මින් යම් සහනයක් සැලසෙනු ඇත.
මෙම පියවර “සදාචාරාත්මක අසාර්ථක වීමක්” ලෙස හඳුන්වමින් එරට හරිත පක්ෂය (Greens) සහ සරණාගත හිමිකම් සුරැකීමේ සංවිධාන දැඩි විරෝධය පළ කර සිටියි. ඇල්බනීස් රජය ඉරාන වැසියන්ගේ ආරක්ෂාව වෙනුවෙන් පෙනී සිටින බව පවසමින් මෙලෙස දොරටු වසා දැමීම පරස්පර විරෝධී බව ඔවුහු පෙන්වා දෙති. විශේෂයෙන්ම මීට දින කිහිපයකට පෙර ඉරාන කාන්තා පාපන්දු කණ්ඩායමේ සාමාජිකාවන් පිරිසකට මානුෂීය වීසා ලබා දීමෙන් පසුව මෙවැනි තීරණයක් ගැනීම පිළිබඳව ද දේශපාලන ලෝකයේ දැඩි කතාබහක් නිර්මාණය වී තිබේ.
