වනසත්ත්ව හා වෘක්ෂලතා ආරක්ෂක ආඥාපනත සහ සත්ත්ව රෝග පනත උල්ලංඝනය කරමින්, රුපියල් මිලියනයකට ආසන්න වටිනාකමකින් යුත් විදේශීය සුරතල් සතුන් 38 දෙනෙකු මෙරටට ගෙන ඒමට උත්සාහ කළ පුද්ගලයෙකු අද (26) අලුයම කටුනායක බණ්ඩාරනායක ජාත්යන්තර ගුවන්තොටුපොළේදී (BIA) අත්අඩංගුවට ගෙන තිබේ. පොලිස් මත්ද්රව්ය නාශක කාර්යාංශයේ නිලධාරීන් සහ රේගු නිලධාරීන් එක්ව සිදුකළ විශේෂ මෙහෙයුමකදී මෙම වැටලීම සිදු කෙරිණි.
අත්අඩංගුවට ගත් සැකකරු මහනුවර, දිගන ප්රදේශයේ පදිංචි 56 හැවිරිදි අයෙකු වන අතර ඔහු අද අලුයම 12:01 ට තායි එයාර්වේස් (Thai Airways) ගුවන් යානයකින් බැංකොක් සිට මෙරටට පැමිණ ඇත. ඔහුගේ ගමන් මලු පරීක්ෂා කිරීමේදී ඒ තුළ සඟවා තිබූ කූඩු කිහිපයක සිටි ගිනිබිංදුවා (Guinea pigs), ලේනුන් (Squirrels), පරෙවි විශේෂ (Doves), ෂුගර් ග්ලයිඩර්ස් (Sugar gliders) සහ හෙජ්හෝග්ස් (Hedgehogs) ඇතුළු සතුන් 38 දෙනෙකු සොයා ගැනීමට බලධාරීහු සමත් වූහ.
විමර්ශන කටයුතු අවසානයේ රේගු නිලධාරීන් විසින් සැකකරුට රුපියල් 250,000ක දඩයක් නියම කළ අතර, අත්අඩංගුවට ගත් සතුන් තොගය යළි බැංකොක් වෙත යැවීම සඳහා තායි එයාර්වේස් ගුවන් සමාගම වෙත භාර දී තිබේ. මෙවැනි විදේශීය සතුන් මෙරටට ගෙන ඒම මඟින් දේශීය පරිසර පද්ධතියට සහ සෞඛ්යයට එල්ල විය හැකි දැඩි අවදානම පිළිබඳව රේගු බලධාරීන් මෙහිදී ජනතාව දැනුවත් කළහ.
