දිට්වා ව්යසනයෙන් බරපතල හානියට පත් නානුඔය සහ අඹේවෙල අතර දුම්රිය මාර්ගයේ ප්රතිසංස්කරණ කටයුතු ප්රමාදයකින් තොරව නිම කිරීමට අවශ්ය සියලු සහයෝගය ලබාදෙන බව ප්රවාහන අමාත්ය බිමල් රත්නායක මහතා පවසයි. පසුගිය 25 වනදා උඩරට දුම්රිය මාර්ගයේ ඇල්ජින් දිය ඇල්ල ආශ්රිතව සිදුවන අවසන් අදියරේ ඉදිකිරීම් නිරීක්ෂණය කිරීම සඳහා එක්වූ අමාත්යවරයා, එහි නිරත සේවක පිරිස්වල පහසුකම් පිළිබඳව ද සොයා බැලීය. “Rebuilding Sri Lanka” ජාතික වැඩසටහනට සමගාමීව මෙම ප්රතිසංස්කරණ කටයුතු ක්රියාත්මක වන අතර, ව්යසනයෙන් හානියට පත් ස්ථාන 14න් 13ක වැඩකටයුතු මේ වන විටත් සම්පූර්ණයෙන් අවසන් කර තිබේ.
දැනට උඩරට දුම්රිය මාර්ගයේ ධාවන කටයුතු රඹුක්කන දක්වා පමණක් සීමා වී ඇති අතර, ඉතිරි මාර්ග කොටස ජාතික ගොඩනැගිලි පර්යේෂණ ආයතනයේ (NBRO) අනුමත සැලසුම්වලට අනුව වඩාත් සුරක්ෂිතව ප්රතිසංස්කරණය කිරීමට රජය පියවර ගෙන ඇත. මේ සඳහා ජාත්යන්තරව පිළිගත් පළපුරුදු සමාගම්වල සහය ලබාගැනීමට අපේක්ෂිතය. මෙම ප්රතිසංස්කරණ කටයුතු එළඹෙන ජූනි මාසය අවසන් වන විට නිම කර, ප්රදේශයේ ජනතාවගේ ප්රවාහන අවශ්යතා මෙන්ම සංචාරක සහ ආර්ථික කටයුතු සඳහා මාර්ගය යළි විවෘත කිරීමට සැලසුම් කර ඇති බව අමාත්යවරයා වැඩිදුරටත් අවධාරණය කළේය.
