වාරි පද්ධතිය සංවර්ධනය කිරීම මගින් ග්රාමීය ජනතාවට ශක්තිමත් ආර්ථික තත්ත්වයක් ගොඩනගා දිය හැකි අතරම, ඔවුන් ජාතික ආර්ථිකයට සෘජුව දායක කර ගත හැකි බව ජනාධිපති අනුර කුමාර දිසානායක මහතා පවසයි. පහළ මල්වතුඔය බහුකාර්ය සංවර්ධන ව්යාපෘතියේ ප්රගතිය සමාලෝචනය කිරීම සඳහා ජනාධිපති කාර්යාලයේ පැවති සාකච්ඡාවකදී ජනාධිපතිවරයා මෙම අදහස් පළ කළේය.
මීට වසර 10කට පෙර ආරම්භ කර ප්රතිපාදන නොමැතිකම හේතුවෙන් අතරමග නැවතුණු මෙම ව්යාපෘතිය යළි ආරම්භ කිරීම සඳහා 2026 වර්ෂය වෙනුවෙන් රුපියල් මිලියන 5000ක අයවැය ප්රතිපාදන වෙන් කර ඇත. 2029 – 2030 වසර වන විට සම්පූර්ණයෙන්ම අවසන් කර ජනතා අයිතියට පත් කිරීමට අපේක්ෂිත මෙම ව්යාපෘතිය ඉදිවීමෙන් පසු උතුරු මැද පළාතේ විශාලතම ජලාශය බවට පත්වන අතර, මන්නාරම දිස්ත්රික්කයේ යෝධ වැව සහ අකිතමුරුප්පු වැව යටතේ අක්කර 40,000ක කුඹුරු ඉඩම් වගා කිරීමටත්, පානීය ජලය, ජලවිදුලි උත්පාදනය, ගංවතුර පාලනය සහ වනඅලි ගැටලු කළමනාකරණය ඇතුළු ප්රතිලාභ රැසක් හිමි වේ. ව්යාපෘතිය හේතුවෙන් අවතැන් වන ජනතාවට නවීන කෘෂිකාර්මික ව්යාපෘති සහ ස්ථාවර වෙළෙඳපොළක් ලබාදෙමින් වඩා හොඳ ජීවන තත්ත්වයක් යටතේ නැවත පදිංචි කිරීමටද මෙහිදී අවධානය යොමු කෙරිණි.
