Apple සමාගම අද (13) HomeView නමින් නව ස්මාර්ට් හෝම් හබ් උපාංගයක් හඳුන්වා දී තිබේ. අඟල් 7ක Liquid Retina තිරයකින් සමන්විත මෙම උපාංගය නිවසේ මධ්‍යම පාලන තිරයක් ලෙස ක්‍රියා කරන අතර, විනෝදාස්වාදය, සන්නිවේදනය සහ ස්මාර්ට් නිවාස පාලනය එකම ස්ථානයකින් සිදු කිරීමට පහසුකම් සලසයි.
සංගීතයට සවන් දීම, FaceTime වීඩියෝ ඇමතුම් ලබාගැනීම, නිවස නිරීක්ෂණය කිරීම සහ හඬ විධාන මඟින් විවිධ කාර්යයන් පාලනය කිරීම ඇතුළු පහසුකම් මෙහි අන්තර්ගත වේ. එසේම, නිවසේ සිටින පුද්ගලයන් හයදෙනෙකු දක්වා මුහුණ හඳුනාගැනීමේ තාක්ෂණය ඔස්සේ හඳුනාගෙන, එක් එක් පුද්ගලයාට අදාළ පණිවිඩ, දින දර්ශන, මතක් කිරීම් සහ වෙනත් තොරතුරු පුද්ගලීකරණය කර ලබාදීමටද මෙයට හැකියාව ඇත.
HomeView උපාංගය Apple Intelligence තාක්ෂණයෙන් බලගැන්වූ වැඩිදියුණු කළ Siri සහායකයෙකුගෙන් සමන්විත වේ. වැඩිදියුණු කළ සංවාද හැකියාවන්, සංගීතය සොයාගැනීම සහ තිරයේ දිස්වන තොරතුරු හඳුනාගෙන ඒ අනුව ප්‍රතිචාර දැක්වීම එහි විශේෂාංග අතර වේ. Apple Intelligence පහසුකම සහිත ගැළපෙන iPhone හෝ iPad උපාංගයක් සමඟ සම්බන්ධ කළ විට, පරිශීලකයාගේ දින දර්ශනය, පණිවිඩ සහ යෙදුම්වල තොරතුරු ආරක්ෂිතව භාවිත කර වඩාත් ගැළපෙන පිළිතුරු ලබාදීමටද හැකි බව සමාගම සඳහන් කරයි.
මෙම උපාංගය මේසයක් මත තැබිය හැකි ආකෘතියකින් මෙන්ම බිත්තියේ සවි කළ හැකි වෙනම ආකෘතියකින්ද ලබාගත හැකිය. මේසය මත තබන ආකෘතිය ගෝලාකාර ස්පීකර් පදනමක් සහ මල නොබැඳෙන වානේ සන්ධියකින් සමන්විත වේ.
HomeView සඳහා පෙර ඇණවුම් ඔක්තෝබර් 13 වැනිදා සිට ආරම්භ වන අතර, නොවැම්බර් 13 වැනිදා සිට වෙළෙඳපොළට නිකුත් කිරීමට නියමිතය. එහි ආරම්භක මිල ඇමරිකානු ඩොලර් 299ක් ලෙස ප්‍රකාශයට පත් කර තිබේ.
