වයස අවුරුදු 16ට අඩු දරුවන් සඳහා ඕස්ට්රේලියාව පනවා ඇති ලොව ප්රථම සමාජ මාධ්ය තහනම ක්රියාත්මක කිරීමේදී ඇති වී තිබෙන ගැටලු, තාක්ෂණයේ සීමාවන් නිසා නොව සමාජ මාධ්ය ආයතන විසින් අදාළ මෙවලම් නිසි ලෙස භාවිත නොකිරීම නිසා හටගෙන ඇති බව වයස තහවුරු කිරීමේ තාක්ෂණික සේවා සපයන්නන්ගේ සංගමය (AVPA) පවසයි.
වයස තහවුරු කිරීමේ තාක්ෂණික සේවා සපයන්නන්ගේ සංගමයේ විධායක අධ්යක්ෂ ඉයන් කෝබි (Iain Corby) පෙන්වා දෙන්නේ, ගැටලුව පවතින්නේ තාක්ෂණික හැකියාව පිළිබඳව නොව එය ප්රායෝගිකව යොදා ගැනීම පිළිබඳව බවයි. සමාජ මාධ්ය ජාල සතුව වයස පරීක්ෂා කිරීමේ මෙවලම් තිබුණද, ඒවා නිසි ලෙස බලාත්මක කිරීමට ඔවුන් අපොහොසත් වී ඇති බවට ඔහු චෝදනා කරයි.
ඕස්ට්රේලියාවේ ඩිජිටල් ආරක්ෂණ කොමසාරිස්වරයා (eSafety Commissioner) මේ වන විට මෙටා (Facebook සහ Instagram), ගූගල් (YouTube), ටික්ටොක් (TikTok) සහ ස්නැප් (Snap) යන සමාගම්වලට එරෙහිව පරීක්ෂණ ආරම්භ කර තිබේ. මෙම ආයතන වයස අවුරුදු 16ට අඩු දරුවන්ට තම වේදිකාවන් භාවිතා කිරීමට ඉඩ ලබා දීම හරහා පනවා ඇති නීති උල්ලංඝනය කර ඇති බවට සැක කෙරේ.
මෙම නීති උල්ලංඝනය කරන සෑම අවස්ථාවකදීම අදාළ සමාගම්වලට ඕස්ට්රේලියානු ඩොලර් මිලියන 49.5ක (ඇමෙරිකානු ඩොලර් මිලියන 35ක පමණ) දැවැන්ත දඩ මුදලක් ගෙවීමට සිදුවනු ඇත. තත්ත්වය යහපත් නොවන්නේ නම් ඉදිරියේදී ෆෙඩරල් උසාවිය හරහා නීතිමය ක්රියාමාර්ග ගැනීමට අවශ්ය සාක්ෂි රජය විසින් මේ වන විට රැස් කරමින් පවතී.
ඕස්ට්රේලියාව 2025 දෙසැම්බර් මාසයේ සිට මෙම තහනම ක්රියාත්මක කළද, එය සාර්ථක කර ගැනීම සඳහා සමාජ මාධ්ය සමාගම්වල සෘජු සහයෝගය අත්යවශ්ය වී තිබේ.
