පලාලි නැගෙනහිර ප්රදේශයේ අධි ආරක්ෂිත කලාපය තුළ පිහිටි ජනතාවට අයත් ඉඩම් සහ සියලුම ආගමික ස්ථාන කඩිනමින් නිදහස් කර ලබා දීම සඳහා ආරක්ෂක මණ්ඩලය සමඟ සාකච්ඡා කරන බව නියෝජ්ය ආරක්ෂක ඇමැති අරුණ ජයසේකර මහතා පවසයි. පසුගියදා (26) යාපනයේ කළ සංචාරයකදී ඒ මහතා මේ බව ප්රකාශ කළේය.යාපනයේ සංචාරය කළ නියෝජ්ය අමාත්යවරයා පලාලි ප්රදේශයේ පවතින තත්ත්වය නිරීක්ෂණය කළ අතර, එහිදී ධීවර අමාත්ය රාමලිංගම් චන්ද්රසේකරන් සහ උතුරු පළාත් ආණ්ඩුකාර නාගලිංගම් වේදනායගම් යන මහත්වරුන් විසින් ජනතා ඉඩම් නිදහස් කිරීමේ ඇති වැදගත්කම සහ 1986 වසරේ සිට හිඟව පවතින වන්දි මුදල් ලබා දීමේ අවශ්යතාවය පිළිබඳව පෙන්වා දෙන ලදී.
ඉහළ පෙළේ නිලධාරීන් සමඟ සාකච්ඡා කොට මෙම ගැටලුවලට කඩිනම් තීරණ ලබා දෙන බවට නියෝජ්ය අමාත්යවරයා එහිදී පොරොන්දු විය. පලාලි අධි ආරක්ෂිත කලාපය තුළ පවතින ජනතා ඉඩම් පියවරෙන් පියවර නිදහස් කිරීමට ජනාධිපතිවරයා මීට පෙර එකඟතාව පළ කර තිබූ බවත්, එහි ප්රතිඵලයක් ලෙස දැනට එම ඉඩම් හඳුනා ගැනීමේ කටයුතු සිදු කෙරෙමින් පවතින බවත් ධීවර අමාත්යවරයා වැඩිදුරටත් සඳහන් කළේය.
